ریاض: سعودی عرب کے شہر طائف میں واقع فوجی مرکز پر دو مسلح افراد نے حملہ کردیا جس کے نتیجے میں ایک اہلکار جاں بحق اور متعدد زخمی ہوگئے۔
عرب میڈیا کے مطابق فائرنگ کے تبادلے میں ایک حملہ آور زخمی حالت میں گرفتار کرلیا گیا جبکہ اس کا ساتھی فرار ہونے میں کامیاب ہوگیا، حملہ آوروں نے حملے کے لیے ٹریفک اہلکار کو قتل کیا اور اس کا اسلحہ اور گاڑی چھینی۔
فوجی مرکز پر حملے میں زخمی اہلکاروں کو فوری طور پر نجی اسپتال منتقل کردیا گیا ہے، جہاں ان کی حالت خطرے سے باہر بتائی جارہی ہے۔
حملے کی ذمہ داری کسی شدت پسند تنظیم نے قبول نہیں کی ہے تاہم ماضی میں داعش اور القاعدہ کی تنظیموں کی جانب سے سعودی فورسز پر حملے کئے جاتے رہے ہیں۔
مکہ مکرمہ کے مشرق میں واقع طائف میں پیش آنے والے واقعے سے متعلق سعودی وزارت داخلہ فوری طور پر کچھ بتانے سے گریزاں ہے۔
إطلاق نار في شارع الستين في #الطائف ..
اللهم عليك بمن يروع قلوب الآمنين واجعل بلادهم آمنة مستأمنة على أرواح الأبرياء منهم والخائفين . #الطايف_الآن #اطلاق_نار_في_الطائف pic.twitter.com/XoJX8wADiT— ابتسام آل سعد (@Ebtesam777) May 30, 2018
ابتسام السعد نے سماجی رابطے کی ویب سائٹ ٹویٹر پر اپنے پیغام میں کہا ہے کہ یا اللہ یہ کیسا بدلہ ہے کہ معصوم اور پرامن زندگی گزارنے والے لوگوں کو نشانہ بنایا جارہا ہے۔
واضح رہے کہ سعودی عرب کے مختلف شہروں میں حوثی باغیوں کی جانب سے بیلسٹک میزائل بھی فائر کئے جاتے رہے ہیں جبکہ سعودی اتحادی فورسز نے ان میزائلوں کو فضا میں ہی ناکارہ بنادیا تھا۔