پیانگ یانگ: شمالی کوریا میں سیلاب نے تباہی مچادی جس کے باعث 76 افراد ہلاک جبکہ درجنوں لاپتہ ہوگئے۔
تفصیلات کے مطابق شمالی اور جنوبی ہوانگھائی صوبوں میں شدید بارشوں کے سبب آنے والے سیلاب نے نظام زندگی درہم برہم کردی جس کے باعث پچھتر افراد کی ہلاکتیں ہوئیں اور متعدد لاپتہ ہوگئے۔
غیر ملکی خبر رساں ادارے کے مطابق شدید بارشوں کے باعث آنے والے سیلاب سے لینڈ سلائیڈنگ بھی ہوئی جس کے سبب 800 سے زائد عمارتوں کو نقصان پہنچا۔
قدرتی آفت کے باعث ہلاک ہونے والوں میں بڑی تعداد بچوں کی بھی ہے، تاہم حکام کی جانب سے سہولیات فراہم کرنے کے لیے ہرممکن اقدامات کیے جارہے ہیں۔
شمالی کوریا میں سیلاب،133افراد ہلاک
اس سے قبل 2016 میں بھی شمالی کوریا کو سیلابی صورت حال کا سامنا کرنا پڑا تھا، قدرتی آفت کے باعث 130 سے زائد افراد زندگی کی بازی ہار گئے تھے۔
واضح رہے کہ شمالی کوریا میں 2012 میں سیلاب کے باعث کم و بیش 150 افراد ہلاک اور بہت سے بے گھر ہوگئے تھے۔
یاد رہے کہ مذکورہ سیلاب کے نتیجے میں 35 ہزار کے قریب گھروں کو نقصان پہنچا تھا، جن میں سے بیشتر مکمل طور پر تباہ ہوئے، 8 ہزار سے زائد عمارتیں شدید متاثر ہوئے تھے، جب کہ علاقے میں روڈ، مواصلات اور دیگر نظام زندگی مکمل طور مفلوج ہوگیا تھا۔
