بالی ووڈ انڈسٹری کی سینئر اداکارہ شبانہ اعظمی نے شادی کے بعد جاوید اختر کے ساتھ تعلقات کے حوالے سے بتایا ہے کہ ایسا وقت بھی آیا جب ہمارے درمیان تین بار علیحدگی تک نوبت آگئی تھی۔
اپنے ایک حالیہ انٹرویو میں انہوں نے شادی کے بعد اپنے اور جاوید اختر کے معاملات پر کھل کر بات کی اور بتایا کہ کو وہ کون سے عوامل تھے جنہوں نے ہمیں ایک دوسرے سے الگ نہیں ہونے دیا۔
بھارتی اداکارہ شبانہ اعظمی کا شمار بالی ووڈ انڈسٹری کی سب سے بااثر اداکاراؤں میں کیا جاتا ہے۔ کئی برسوں پر مشتمل اداکاری کے کیریئر کے ساتھ تجربہ کار اداکارہ نے فلم انڈسٹری میں ایک زبردست مقام حاصل کیا ہے۔
شبانہ اعظمی نے انٹرویو کے دوارن اپنی شادی شدہ زندگی میں آنے والے نشیب و فراز پر تفصیلی گفتگو کی اور جاوید اختر سے ساتھ ہونے والی تلخیوں کی وجوہات کے بارے میں سامعین کو آگاہ کیا۔
معروف فلم اسٹار کو جاوید اختر سے اس وقت محبت ہوئی جب وہ ہنی ایرانی کے شوہر تھے اور ان کے دو بچے بھی تھے۔ شبانہ اعظمی نے بتایا کہ اسی بات کے پیش نظر شادی کے اولین ایام میں بہت سی مشکلات کا سامنا کرنا پڑا اور ہم پر ہونے والی تنقید نے ہماری زندگی کو بری طرح متاثر کیا۔
انہوں نے بتایا کہ وہ بہت مشکل ترین دور تھا اداکارہ نے یہ بھی انکشاف کیا کہ ایک مرحلہ ایسا بھی آیا کہ میں نے اختر کے بچوں کی وجہ سے تین بار اپنا رشتہ ختم کرنے کی کوشش کی لیکن ایسا نہیں ہوسکا۔
انہوں نے مزید کہا کہ اب اختر کے بچوں فرحان اور زویا کے ساتھ میرا رشتہ پہلے سے کہیں زیادہ مضبوط ہے، درحقیقت جب انہیں والد سے کوئی مسئلہ ہوتا ہے تو وہ میری طرف رجوع کرتے ہیں! اچھی بات یہ ہے کہ میں ان سب کی بہت اچھی دوست ہوں۔