سابق وفاقی وزیر برائے اقتصادی امور حماد اظہر نے کہا ہے کہ شبر زیدی کی یادداشت فارغ ہو گئی ہے یا کسی کو راضی کرنے کے چکر میں ہیں۔
تفصیلات کے مطابق پی ٹی آئی کے رہنما اور سابق وفاقی وزیر برائے اقتصادی امور حماد اظہر نے نجی چینل پر شبر زیدی کی جانب سے کی جانے والی گفتگو پر تنقید کی ہے، انھوں نے اپنی ٹوئٹ میں کہا کہ شبر زیدی کی یادداشت فارغ ہو گئی ہے یا کسی کو راضی کرنے کے چکر میں ہیں۔
حماد اظہر کا اپنی ٹوئٹ میں کہنا تھا کہ شبر زیدی فاٹا میں اسٹیل کی صنعت پر ٹیکس چھوٹ ختم کرنا چاہتے تھے، شبر زیدی نے مجھ سے خود رابطہ کیا اور کہا کہ میری حمایت کرو۔
انھوں نے مزید کہا کہ ٹی وی پربول رہے ہیں کہ حماد نے اپنے مفاد میں میری حمایت کی لیکن وزیراعظم نہیں مانے۔
حماد اظہر نے کہا کہ شبر بھائی کو سمجھنا چاہیے کہ انھیں ٹی وی شو پر پالیسی گفتگو کے لیے نہیں بلایا گیا، مخصوص میڈیا چاہتا ہے کہ ان کے الفاظ کے غلط چناؤ، بھلکڑ پن کو چیئرمین پی ٹی آئی کے خلاف استعمال کیا جائے۔
