لاہور: قومی کرکٹرشاداب خان لندن میں چیک اپ کے بعدکل وطن واپس پہنچ جائیں گے اوروہ ڈاکٹر کے مشورے کے مطابق مزید آرام کریں گے۔
تفصیلات کے مطابق قومی کرکٹ ٹیم میں ریڑھ کی ہڈی کی حیثیت رکھنے والے شاداب خان لند ن میں چیک اپ کے بعدپیر کو وطن واپس پہنچیں گے۔ چند روزقبل چیف سلیکٹر انضمام الحق نے میڈیا کو بتایا تھا کہ شاداب خان کے بلڈ ٹیسٹ میں ہیپاٹائٹس وائرس کی نشاندہی ہوئی ہے جس کے سبب ڈاکٹروں نے انہیں چارہفتے آرام کا مشورہ دیا ہے ۔
شاداب خان کا علاج مشہور ہیپاٹالوجسٹ ڈاکٹر پیٹرک کینیڈی کر رہے ہیں۔ لیگ اسپنر مزید 2 ہفتے تک آرام کریں گے جس کے بعد ان کے مزید بلڈ ٹیسٹ کروائے جائیں گے۔
پی سی بی ذرائع کے مطابق شاداب خان کا ورلڈکپ اسکواڈ میں شمولیت کا فیصلہ ان کے ٹیسٹ رپورٹ کی بنیاد پر کیا جائے گا۔خیال رہے کہ لیگ اسپنر میں ہیپاٹائٹس کی تشخص سے قبل چیف سلیکٹر انضام الحق نے ورلڈ کپ 2019 کے لیے ٹیم کا اعلان کیا تھا جس میں شاداب خان بھی شامل تھے۔
اس کے ساتھ ساتھ وہ انگلینڈ کے خلاف ہونے والی ون ڈے سیریز میں بھی ٹیم کے اسکواڈ کا حصہ تھے تاہم اب ان کی جگہ پر یاسر شاہ کو ٹیم میں شامل کرلیا گیا۔
واضح رہے کہ چند روز قبل شاداب خان کے حوالے سے خبر آئی تھی کہ وہ ہیپاٹائٹس سی کا شکار ہوگئے ہیں اور ان کی ورلڈ کپ میں شرکت مشکوک ہوگئی تھی ، تاہم آل راؤنڈر شاداب خان کو ڈاکٹر نے ابتدائی معائنے کے بعد عالمی کپ تک مکمل صحت یاب ہونے کی نوید سنا دی ہے۔
شاداب خان کی بیماری کے حوالے سے چیف سلیکٹر انضمام الحق کا کہنا تھا کہ وہ انتہائی اہم کھلاڑی ہے اس کا ورلڈ کپ سے قبل فٹ ہونا ضروری ہے۔
