شاہ خاور نے قائم مقام چیئرمین پی سی بی مینجمنٹ کمیٹی کا چارج سنبھال لیا ہے، بورڈ کے انتخابات ہونے تک عہدے پر فائض رہیں گے۔
تفصیلات کے مطابق الیکشن کمشنر پی سی بی شاہ خاور نے پاکستان کرکٹ بورڈ مینجمنٹ کمیٹی کے سربراہ کا چارج سنبھال لیا ہے۔ شاہ خاور بورڈ کے انتخابات ہونے تک ذمہ داری نبھائیں گے۔
گزشتہ دنوں چیئرمین پاکستان کرکٹ بورڈ نامزد ہونے والے محسن نقوی فی الحال ممبر گورننگ بورڈ کے طور پر کام کریں گے۔
الیکشن کمشنر پی سی بی شاہ خاور کرکٹ بورڈ کے انتخابات کرائیں گے۔ ممبرگورننگ بورڈ محسن نقوی چیئرمین پی سی بی کا انتخاب لڑیں گے۔
واضح رہے کہ اس سے قبل نگراں وزیراعلیٰ پنجاب محسن نقوی نے پاکستان کرکٹ بورڈ کا نیا سربراہ بننے اور پی سی بی چیئرمین کے الیکشن میں حصہ لینے کی تصدیق کی تھی۔
محسن نقوی پی سی بی چیئرمین کے الیکشن میں حصہ لے کر آئندہ تین سال کے لیے کرکٹ بورڈ کے سربراہ بننے کے مضبوط امیدوار ہوںگے۔
تیرہ ماہ کے دوران پاکستان کرکٹ بورڈ کو چوتھا نیا سربراہ ملا ہے۔ ذکا اشرف کے استعفیٰ کے بعد وزیراعظم انوار الحق نے محسن نقوی کو پی سی بی گورننگ باڈی میں اپنا امیدوار نامزد کیا تھا۔
