اسلام آباد: وزیر خارجہ شاہ محمود قریشی نے فن لینڈ کے وزیر خارجہ پیکا ہاؤسٹو سے ٹیلی فونک رابطہ کیا، جس میں افغانستان سے متعلق تفصیلی تبادلہ خیال کیا گیا۔
تفصیلات کے مطابق شاہ محمود قریشی نے فن لینڈ کے ہم منصب سے رابطہ کر کے افغان امن عمل اور امن و امان کی صورت حال کے حوالے سے تفصیلی تبادلہ خیال کیا۔
وزیر خارجہ نے افغان اولسی جرگہ کے دورہ پاکستان سے بھی فن لینڈ ہم منصب کو آگاہ کیا، اور افغانستان پر جنیوا کانفرنس میں شرکت کے لیے مدعو کرنے پر فن لینڈ کا شکریہ ادا کیا۔
انھوں نے کہا توقع ہے کانفرنس میں افغان مہاجرین کی باعزت وطن واپسی پر بھی بات ہوگی۔
ٹیلی فونک گفتگو میں شاہ محمود نے کہا ہم خطے میں قیام امن کے لیے مصالحانہ کاوشیں بروئے کار لا رہے ہیں، افغان مسئلے کا واحد حل افغان قیادت میں افغانوں کو قابل قبول مذاکرات ہیں، دوحہ میں بین الافغان مذاکرات امن کے لیے خوش آئند پیش رفت ہے، افغان قیادت کو سنہری موقع پر مذاکرات کو منطقی انجام تک پہنچانا چاہیے۔
دریں اثنا، دونوں وزرائے خارجہ نے افغان امن عمل اور خطے میں استحکام کے لیے باہمی مشاورت جاری رکھنے پر اتفاق کیا۔
کابل یونیورسٹی پر حملہ، مسلح افراد اندر داخل، پولیس سے مقابلہ جاری
واضح رہے آج کابل یونی ورسٹی میں مسلح افراد کی فائرنگ سے متعدد افراد زخمی ہوگئے ہیں، افغان میڈیا کے مطابق یونی ورسٹی میں مسلح افراد کے ایک گروپ نے داخل ہو کر فائرنگ شروع کی، جان بچانے کے لیے طالب علم دیواریں پھلانگ کر باہر نکلے، دوسری طرف سیکورٹی فورسز نے آپریشن کے لیے یونی ورسٹی جانے والی تمام سڑکیں بند کر دی ہیں۔
