اسلام آباد: وزیر خارجہ شاہ محمود قریشی نے سابق وزیر خزانہ مفتاح اسماعیل کے نیب ترامیم سے متعلق بیان کو غلط قرار دے دیا۔
تفصیلات کے مطابق آج اے آر وائی نیوز کے پروگرام الیونتھ آور میں گفتگو کرتے ہوئے وزیر خارجہ شاہ محمود نے کہا کہ وہ مفتاح اسماعیل کے بیان سے اتفاق نہیں کرتے۔
شاہ محمود قریشی نے رد عمل میں کہا ’فیٹف بل سے پہلی بھی ہماری ایک ملاقات ہوئی تھی، مفتاح اسماعیل کے بیان سے اتفاق نہیں کرتا۔‘
انھوں نے پروگرام میں وسیم بادامی سے گفتگو میں کہا فیٹف بل سے قبل ہماری ایک ملاقات ہوئی تھی، جس میں خواجہ آصف، شیری رحمان اور نوید قمر بھی موجود تھے، ہم سے کہاگیا کہ نیب ترامیم پر آپ نہیں مانے تو فیٹف پر بات نہیں ہو سکتی۔
وزیر خارجہ نے کہا کہ مفتاح جس میٹنگ کی بات کر رہے ہیں اس میں وہ پورا پلندہ لائے تھے، دوسری میٹنگ میں اپوزیشن 34 نکات لے آئی تھی، ہم نے جواب میں کہا کہ تمام بل کو نیب سے مشروط نہ کریں۔
شاہ محمود نے بتایا کہ پارٹی کی اکثریت سمجھتی تھی کہ یہ ترامیم پاس نہیں ہونی چاہیے تھیں، عمران خان سمیت اکثریت نے نیب ترامیم کو مسترد کر دیا تھا، مفتاح اسماعیل کا یہ بیان بھی بالکل غلط ہے کہ کابینہ مان چکی تھی۔
واضح رہے کہ ن لیگی رہنما مفتاح اسماعیل نے بیان دیا تھا کہ نیب ترامیم فوج کی ہدایت پر لائے گئے تھے، کابینہ مان گئی تھی لیکن عمران خان نہیں مانے تھے۔
