ملتان : سابق وزیرخارجہ شاہ محمود قریشی نے کہا ہے کہ تحریک انصاف کو بکھیرنے کی خواہش کرنے والےخود بکھرجائیں گے،پی ڈی ایم اتحاد کا شیرازہ بکھرنے والا ہے۔
یہ بات انہوں نے ملتان میں کارکنان کے اجلاس سے خطاب کرتے ہوئے کہی، انہوں نے کہا کہ رجیم چینج کے بعد پی ٹی آئی کی مقبولیت میں کمی نہیں بلکہ اضافہ ہوا ہے۔
ان کا کہنا تھا کہ پی ڈی ایم ملک میں انتشارکی سیاست کررہی ہے، اس کا شیرازہ بکھرنے والا ہے، پی ڈی ایم اتحاد اختتامی منزل کی طرف گامزن ہے، حکمرانوں نے ملکی معیشت کا جنازہ نکال دیا ہے۔
شاہ محمود قریشی نے کہا کہ موجودہ حکمرانوں کو ملک اور قوم کی فکر نہیں، حکمران صرف اقتدارکو طول دینے کے چکروں میں ہیں، ہم نے دو سال تک کورونا کے سخت دیکھے پھر بھی عوام کو ریلیف فراہم کیا۔
پی ٹی آئی کے نائب صدر نے کہا کہ ان کے7ماہ میں مہنگائی عروج پر پہنچ چکی ہے، سرمایہ کاری رک گئی اورغیرملکی سرمایہ کار عدم اعتماد کا اظہار کرچکے ہیں، انڈسٹریز بھی بتدریج بند ہورہی ہیں،
انہوں نے کہا کہ ملک میں اس وقت شدید معاشی بحران ہے، سیاسی عدم استحکام کے باعث معاشی بحران مزید بڑھ رہاہے، ملک کو بحرانوں سے نکالنے کیلئے فوری انتخابات ناگزیر ہیں۔
فوری اور شفاف انتخابات ہی ملک میں سیاسی استحکام پیدا کرسکتے ہیں، عام انتخابات میں جتنی تاخیر ہوگی اتنا ہی ملک کے لئے نقصان ہوگا۔
