اسلام آباد : وزیر خارجہ شاہ محمود قریشی نے کہا ہے کہ پاکستان نےمحبتوں کی راہداری کھولی ہے، کیا مودی کشمیر میں کرفیو ختم کرکے عمران خان کو شکریہ کاموقع دیں گے۔
تفصیلات کے مطابق وزیر خارجہ شاہ محمود قریشی نے اے ار وائی نیوز سے خصوصی گفتگو کرتے ہوئے کہا تاریخی دن ہے، پاکستان نےمحبتوں کی راہداری کھولی ہے، پوری دنیامیں سکھ کرتارپورراہداری کاجشن منارہے ہیں، بھارتی سپریم کورٹ کے فیصلےسےسکھوں کی خوشی پراوس آئی ہے۔
شاہ محمودقریشی کا کہنا تھا کہ مقبوضہ کشمیر میں کرفیو ہے، انٹرنیٹ سروس معطل ہوگئی ہے، بھارتی سپریم کورٹ کی تفصیلات دیکھ کر دفتر خارجہ رد عمل دے گا، بھارتی سپریم کورٹ نے عجلت میں فیصلہ دیا، بابری مسجد کے سانحے میں 2ہزار سے زائد اموات ہوئیں۔
وزیر خارجہ نے کہا کہ کرتارپورراہداری کے افتتاح کے روز فیصلے کا آنا سکھوں کے جذبات مجروح کرنا تھا، گاندھی ، نہرو کا ہندوستان دفن ہورہا ہے، مودی ، آر ایس ایس کا ہندوستان مسلط ہورہا ہے۔
مزید پڑھیں : سکھوں کی خوشیوں کے رنگ میں آج بھنگ ڈالی گئی: شاہ محمود قریشی
ان کا کہنا تھا کہ ہندو توا کے آگے بھارت کے اقلیتی گھٹنے ٹیک رہے ہیں، مودی سے سوال ہے کیا کشمیر میں کرفیو اور انسانی حقوق کی پامالی ختم کرکے عمران خان کو شکریہ کاموقع دیں گے۔
اس سے قبل بھی وزیرخارجہ نے کہا تھا بھارتی سپریم کورٹ کی جانب سے آج کے دن کا انتخاب معنی خیز ہے، پاکستان نے محبتوں کی راہداری قائم کی لیکن مودی سرکار کی سیاست نفرت کی سیاست ہے، نفرت کے بیج بونا بہت خطرناک کھیل ہے، ذہن سے نکال دیں کہ پاکستان دباؤ میں آئے گا یا جھکے گا، ایسا بالکل نہیں، ہم کشمیریوں کے ساتھ کھڑے تھے، کھڑے ہیں، اور کھڑے رہیں گے۔
خیال رہے بھارتی سپریم کورٹ نے بابری مسجد کی متنازع زمین ہندوؤں کو دینے کا فیصلہ سناتے ہوئے کہا تھا بھارتی حکومت کی زیرنگرانی بابری مسجد کی جگہ مندر بنے گا اور مسلمانوں کو ایودھیا میں متبادل جگہ دی جائے۔
