لاہور : سابق وزیر خارجہ اور پی ٹی آئی کے رہنما شاہ محمود قریشی نے کہا ہے کہ موجودہ حکمران اپنی مدت پوری کرنا چاہتے ہیں اور روپیہ گرتا چلاجارہا ہے جس سے معیشت گر رہی ہے۔،
انہوں نے کہا کہ آج پنجاب کے الیکشن کے سلسلے میں پی ٹی آئی کی نمائندگی کیلئے آیا ہوں، گزشتہ ساڑھے 3سال پنجاب کی کارکردگی اورسندھ کا موازنہ کریں، اندازہ ہوجائے گا کہ پنجاب کی کارکردگی کتنی بہترتھی، میں سمجھتا ہوں کہ پنجاب حکومت میں تجربہ کار کھلاڑی ہیں۔
شاہ محمودقریشی نے کہ موجودہ حکمران زبردستی اپنی مدت پوری کرنا چاہتے ہیں اور معیشت گررہی ہے اور روپیہ بھی گرتا چلا جارہا ہے۔
سابق وزیر خارجہ کا کہنا ہے کہ کیا موجودہ حکمرانوں کو اس بات کا ذرا بھی احساس ہے کہ روپے کی قدر مسلسل گرتی جارہی ہے، جس سے مہنگائی کا نیا طوفان آئے گا۔
ان کا کہنا تھا کہ حکمرانوں کا ایجنڈا پاکستان نہیں بلکہ اپنا ذاتی مفاد ہے ان کا سب سے بڑا ایجنڈا نیب قوانین میں ترامیم کا تھا۔
شاہ محمودقریشی نے کہا کہ زرداری صاحب کے مشورے پر چلتے ہوئے ن لیگ پر یہ نوبت آئی ہے، سپریم کورٹ کے چیف جسٹس نے ہدایات دیں کہ کوئی افسر حکم عدولی نہیں کرسکتا، کوئی افسرحکم عدولی کرے گا تو توہین عدالت کی زد میں آئے گا۔
تحریک انصاف کے مرکزی رہنما کا مزید کہنا تھا کہ اگر پنجاب میں ان کے نمبر پورے ہیں تو آفرز کیوں کررہے ہیں، ایسے تو وہ اپنی ہی کہی بات کی نفی کررہےہیں۔
