کراچی کے علاقے گلشن اقبال میں پولیس اہلکار نے خودکشی کرلی، اہلکار کشمیر روڈ پر قتل کیے گئے شاہ رخ کے قتل میں مبینہ طور پر ملوث تھا۔
اے آر وائی نیوز کے مطابق ذرائع کا کہنا ہے کہ کراچی کے علاقے گلشن اقبال میں پولیس اہلکار فرزند نے گرفتاری کے ڈر سے گولی مار کر اپنی زندگی کا خاتمہ کرلیا، خودکشی کرنے والا اہلکار کشمیر روڈ پر دو روز قبل شاہ رخ کے قتل میں ملوث تھا۔
ذرائع کے مطابق اہلکار کو سی سی ٹی وی فوٹیج کی مدد سے شناخت کیا گیا تھا، ایس آئی یو پولیس نے پولیس اہلکار کی گرفتاری کے لیے چھاپہ مارا تھا۔
پولیس حکام کا کہنا ہے کہ پولیس اہلکار نے اہلکاروں کو دیکھ کر خود کو گولی مار کر اپنی زندگی کا خاتمہ کرلیا، اہلکار کی لاش کو ضابطے کی کارروائی کے لیے اسپتال منتقل کردیا گیا۔
واضح رہے کہ گزشتہ دنوں کراچی کے علاقے کشمیر روڈ میں شاہ رخ کو ڈکیتی مزاحمت پر ماں اور بہن کے سامنے قتل کردیا گیا تھا۔
مقتول نے گھر کی دہلیز پر ڈاکو کو ماں کے زیورات چھینتے دیکھا تو وہ ڈاکو پر لپکا جس پر ڈاکو نے فائرنگ کردی جس کے نتیجے میں وہ جاں بحق ہوگیا تھا۔
شاہ رخ کے بھائی نے بتایا تھا کہ فائرنگ سے شاہ رخ زخمی ہوا تو کسی نے اسپتال پہنچانے میں مدد نہیں کی۔
بھائی نے بتایا تھا کہ شاہ رخ کی کسی سے دشمنی نہیں تھی ہنستا کھیلتا میرا بھائی دنیا سے چلا گیا، گارڈ بھی یہاں بیٹھا لیکن تماشہ دیکھتا رہا۔
