اسلام آباد: وزیراعظم شہباز شریف نے ورلڈ جونیئر اسکواش چیمپئن حمزہ خان کو حوصلہ افزائی کیلئے ایک کروڑ روپے کا انعامی چیک دیا۔
تفصیلات کے مطابق وزیر اعظم شہباز شریف سے ورلڈ جونیئر اسکواش چیمپئن حمزہ خان نے ملاقات کی جہاں وزیراعظم نے حمزہ خان کی حوصلہ افزائی کیلئے ایک کروڑ روپے کا انعامی چیک دیا۔
ورلڈ جونیئر اسکواش چیمپئن حمزہ خان نے وزیر اعظم شہباز شریف کا شکریہ ادا کیا اور پاکستان اسکواش فیڈریشن کےتعاون کی تعریف کی اس موقع پر وزیراعظم شہباز شریف نے حمزہ کے والدین سے پشتو میں گفتگو بھی کی۔
وزیر اعظم نے آسٹریلیا میں عالمی جونیئر چیمپئن شپ جیتنے پر حمزہ اور ان کے والدین کو مبارکباد پیش کی۔
وزیراعظم نے کہا کہ آپ جیسے باصلاحیت نوجوان ہماری قوم کا فخر اور قومی سرمایہ ہیں، اسکواش کا اتنا بڑا ٹائٹل جتوا کر مجھ سمیت پوری قوم کا سر فخر سے بلند کر دیا۔
انہوں نے کہا کہ اسکواش ایک بہترین کھیل ہے، ماضی میں میں بھی اسکواش کھیلتا رہا ہوں، امید ہے آپ جلد ہی اپنی محنت اور لگن سے اسکواش کا سینئر عالمی ٹائٹل بھی جیتیں گے۔
وزیراعظم نے مزید کہا کہ آپ پاکستان کے دیگر نوجوانوں اور کھلاڑیوں کیلئے رول ماڈل ہیں، ہمیشہ کوشش رہی نوجوانوں کو کھیلوں کی بین الاقوامی سہولیات فراہم کی جائیں جس کے لیے حال ہی میں کھیلوں کے فروغ اورکھلاڑیوں کی ترقی کیلئے قومی اسپورٹس اقدامات کا اجرا کیا۔
