تہران: وزیر اعظم پاکستان شہباز شریف نے تہران میں تعزیتی تقریب میں عالمی رہنماؤں سے ملاقاتیں کی ہیں۔
تفصیلات کے مطابق ایران کے تعزیتی دورے پر تہران میں موجود وزیراعظم شہباز شریف نے تاجکستان، آذربائیجان، قطر اور ترکیہ کے رہنماؤں سے ملاقاتیں کیں۔
تاجکستان کے صدر امام علی رحمان سے ملاقات میں دو طرفہ تعلقات کو مزید مستحکم کرنے کے حوالےسے بات چیت ہوئی، ملاقات میں باہمی دل چسپی کے امور پر بھی تبادلہ خیال ہوا۔
وزیر اعظم شہباز شریف سے آذربائیجان کے وزیر اعظم علی اسدوو کی بھی ملاقات ہوئی، جس میں پاکستان اور آذربائیجان کے دو طرفہ تعلقات مزید مستحکم کرنے کے حوالے سے بات چیت ہوئی، وزیر اعظم نے باکو میں ہونے والی 29 ویں اقوام متحدہ کانفرنس کی کامیابی کے حوالے سے نیک خواہشات کا اظہار کیا۔
شہباز شریف اور قطر کے امیر شیخ تمیم بن حمد آل ثانی کے درمیان ہونے والی ملاقات میں پاک قطر دو طرفہ تعلقات اور باہمی دل چسپی کے دیگر امور پر بات چیت ہوئی۔ وزیر اعظم کی ترکیہ کے نائب صدر جودت یلماز اور ترکیہ کے وزیر خارجہ کے ساتھ الگ الگ ملاقاتیں ہوئیں، جن میں دو طرفہ اور باہمی دل چسپی کے دیگر امور پر بات چیت ہوئی، وزیر اعظم نے ترک صدر رجب طیب اردوان کو دورہ پاکستان کی دعوت کا اعادہ کیا۔
