سندھ کے شہر شہداد کوٹ میں شادی کے گھر میں صفِ ماتم بچھ گئی۔
اے آر وائی نیوز کے مطابق شہداد کوٹ میں شادی کی تقریب میں ہوائی فائرنگ کے نتیجے میں دلہن کا 13 سال کا بھائی جاں بحق ہوگیا۔
پولیس کا کہنا ہے کہ تحصیل وارہ میں شادی کی تقریب میں باراتیوں نے فائرنگ کی، گولی لگنے پر دلہن کے بھائی کو زخمی حالت میں اسپتال لے جایا گیا جہاں وہ زخموں کی تاب نہ لاتے ہوئے دم توڑ گیا۔
پولیس نے ذمہ داران کے خلاف تاحال کوئی کارروائی نہیں کی۔
واضح رہے کہ رواں ماہ 16 جنوری کو کراچی کے علاقے لانڈھی میں شادی کی تقریب میں ہوائی فائرنگ سے ایک شخص جاں بحق ہوگیا تھا۔
لانڈھی نمبر 6 فاروق مسجد کے قریب شادی کی تقریب میں فائرنگ کا واقعہ پیش آیا تھا جس میں ایک شخص موقع پر ہی جان کی بازی ہار گیا تھا۔
اس حوالے سے پولیس حکام کا کہنا تھا کہ شادی میں ہوائی فائرنگ سے ایک شخص کے سینےمیں گولی لگی جس کی شناخت 45 سالہ حمید کے نام سے ہوئی مقتول کی لاش رات گئے جناح اسپتال پہنچائی گئی تھی۔
مقتول حمید دولہے کارشتہ دار اور اسی محلے کا رہائشی تھا، پولیس کا کہنا تھا کہ اہلکار جب جائے وقوعہ پر پہنچے تو شادی کی تقریب والے گھروں کو تالے لگے ہوئے تھے اور مکین فرار ہوچکے تھے۔
