قومی کرکٹ ٹیم کے فاسٹ باؤلر شاہین شاہ آفریدی نے اپنے سسر شاہد آفریدی کے ساتھ جم میں ورک آؤٹ کیا اور اس تجربے کو ناقابل فراموش قرار دے دیا۔
دنیا بھر میں اپنی تیز بولنگ سے دھاک بٹھانے والے پاکستان کرکٹ ٹیم کے مایہ ناز بولر شاہین شاہ آفریدی نے اپنے سسر سابق کپتان شاہد آفریدی کے ساتھ جم میں ورزش کی اور اس ورک آؤٹ کو ناقابل فراموش قرار دیدیا۔
شاہین شاہ آفریدی نے سماجی رابطے کی ویب سائٹ ٹوئیٹر پر اپنے ہونے والے سسر شاہد آفریدی کے ہمراہ ایک تصویر شیئر کی اور اس تصویر کے کیپشن میں لکھا ہے کہ ‘ ورک آؤٹ کرنے کا اصل مزا تب شروع ہوتا ہے جب آپ لالہ کے ساتھ جم جائیں۔’
The real workout starts when you hit the gym with Lala @safridiofficial pic.twitter.com/4M3briHZyV
— Shaheen Shah Afridi (@iShaheenAfridi) August 1, 2022
یاد رہے کہ شاہین شاہ آفریدی کا رشتہ کرکٹ کی دنیا میں اپنی بیٹنگ سے اچھے اچھے بولر کے چھکے چھڑا دینے والے لیجنڈری آل راؤنڈر شاہد آفریدی کی صاحبزادی سے طے ہوا ہے جس کی دونوں خاندانوں کی جانب سے تصدیق بھی کی جاچکی ہے۔
واضح رہے کہ شاہین شاہ آفریدی کھیل کے میدان میں اپنے ہونے والے سسر شاہد آفریدی کی 10 نمبر والی شرٹ استعمال کرتے ہیں اور اس کی وجہ ان کی شاہد آفریدی سے محبت ہے۔
یہ بھی پڑھیں: شاہین نے آفریدی کا جرسی نمبر کیوں لیا؟ جانئے دلچسپ کہانی
فاسٹ بولر شاہین آفریدی نے اپنے 10 نمبر کے ٹی شرٹ کی کہانی بیان کرتے ہوئے کہا کہ پہلے شرٹ کا نمبر 40 تھا لیکن میں چاہتا تھا کہ 10 نمبر مجھے ملے کیوں کہ لالہ (شاہد آفریدی) یہ نمبر استعمال کرتے ہیں اور وہ بچپن سے میرے فیورٹ ہیں میری خواہش تھی کہ مجھے 10 نمبر ملے اور آفریدی نام اس پر لکھا ہو۔