کراچی: شہر قائد کے مشہور علاقے کٹی پہاڑی پر پولیس اہل کاروں اور اسٹریٹ کرمنلز کے درمیان مقابلے کے بعد شاہین فورس نے 2 افراد کو زخمی حالت میں گرفتار کر لیا۔
ترجمان ڈسٹرکٹ سینٹرل پولیس کے مطابق شاہراہِ نور جہاں کی حدود کٹی پہاڑی پر شاہین فورس کے اہل کاروں کا اسٹریٹ کرمنلز کے ساتھ مقابلہ ہوا۔
اہل کاروں اور ملزمان کا سامنا عین اس وقت ہوا جب 3 مسلح ملزمان ایک شہری سے کٹی پہاڑی پر لوٹ مار کر رہے تھے۔
شاہین فورس کے اہل کار گشت کرتے ہوئے موقع پر پہنچے تو ایک شہری نے انھیں واردات کے سلسلے میں اشارہ کر دیا، جس پر فورس کے اہل کار اسٹریٹ کرمنلز کے گرد گھیرا ڈالنے کی کوشش کرنے لگے۔
پولیس ترجمان کے مطابق ملزمان نے اہل کاروں کو دیکھتے ہی فائرنگ کرتے ہوئے فرار ہونے کی کوشش کی، تاہم پولیس نے حفاظتِ اختیاری جوابی فائرنگ کی، جس سے دو ملزمان موقع پر زخمی ہو گئے، جب کہ ان کا ایک ساتھی فرار ہونے میں کامیاب ہو گیا۔
گرفتار زخمی ملزمان کی شناخت انعام ولد شعیب اور ہاشم ولد مغرب کے ناموں سے ہوئی ہے۔
ملزمان سے موقع پر ایک عدد ٹی ٹی پستول، 30 بور لوڈ میگزین اور 4 عدد موبائل فون برآمد ہوئے، جن میں موقع پر موجود ایک شہری سے چھینا گیا موبائل فون بھی شامل تھا۔
پولیس حکام کے مطابق زخمی ملزمان کو فوری طبی امداد کے لیے اسپتال روانہ کیا گیا، بعد ازاں ان کے خلاف مقدمہ درج کیا جائے گا۔
