قومی ٹیم کے سابق کپتان شاہد آفریدی نے اپنے پسندیدہ چھکے کا بتا دیا۔
سابق کپتان شاہد آفریدی سے حالیہ انٹرویو میں میزبان نے سوال کیا کہ اتنے چھکے لگائے ہیں آپ نے کوئی ایک پسندیدہ چھکا جو آپ کہیں یہ تھا جس سے مجھے خوشی ہوئی تھی؟
شاہد آفریدی نے کہا کہ بریٹ لی کو سڈنی کرکٹ گراؤنڈ میں فرنٹ فٹ پر چھکا مارا تھا، اس کے پیس کے ساتھ ٹائم کیا تھا اور مڈ آف کی جانب چھکا ہوا تھا وہ شاٹ مجھے بہت اچھا لگا تھا۔
واضح رہے کہ کرکٹ کے میدانوں میں بولرز کے چھکے چھڑانے والے سابق آل راؤنڈر شاہد آفریدی نے دنیا کا سب سے اونچا چھکا لگانے کے ساتھ ساتھ اب تک دنیائے کرکٹ میں 476 چھکے لگائے ہیں۔
شاہد آفریدی نے 4اکتوبر 1996 میں سری لنکا کے خلاف صرف 37 گیندوں کی مدد سے 102 رنز بنائے جو 20 سال تک ایک ریکارڈ رہا۔
یوں تو شاہد آفریدی کے درجنوں چھکے ایسے ہیں جو ان کے چاہنے والوں کو ناصرف یاد بلکہ انتہائی پسند ہیں لیکن اپنی شناخت رکھنے والے 2 چھکے آج تک ایک ریکارڈ ہیں، میلبرن کرکٹ اسٹیڈیم کا وہ چھکا جس پر انہیں 12 رنز ملے تھے اوران کا شکار ہونے والے بولر فلیمنگ تھے۔
اسٹیڈیم پر چھت تھی اور قواعد و ضوابط کے مطابق بلے باز کی جانب سے گیند کو چھت تک پہنچانے والے کے کھاتے میں 12 رنز کا اضافہ کیا جائے گا اور جب شاہد آفریدی نے گیند کو چھت تک پہنچا دیا تو ایمپائر ہولڈر بھی پریشان تھے کہ 12 رنز کا سگنل کیا دیا جائے۔
لیکن پھر انہوں نے دونوں ہاتھوں کی کلائیاں جوڑ کر کراس بنایا جس کا مطلب کسی کی سمجھ میں نہ آسکا، کرکٹ کے مقتدر حلقوں نے اس اشارے کو 12 رنز کا سگنل کہا جب کہ شائقین کا کہنا ہے کہ ایمپائر کا اشارہ تھا کہ اب حد ہوگئی شاہد آفریدی کو دونوں ہاتھوں سے پکڑ لو۔
شاہد آفریدی کا ایک چھکا اس وجہ سے مشہور ہے کہ بلے سے لگنے کے بعد گیند وکٹ سے 158 میٹر دور گری جو اب تک ایک ریکارڈ ہے۔
