قومی ٹیم کے سابق کپتان شاہد آفریدی نے بابر اعظم کی کور ڈرائیو کو ویرات کوہلی اور اسٹیو اسمتھ سے بہتر قرار دیا ہے۔
سابق کپتان اور اسٹار آل راؤنڈر شاہد آفریدی سے نجی ٹی وی کے پروگرام میں ایک مداح نے سوال کیا کہ آپ ویرات کوہلی، اسٹیو اسمتھ اور بابر اعظم میں سے کس کی کور ڈرائیو کو پسند کرتے ہیں۔
شاہد آفریدی نے کہا کہ میرے نزدیک پہلا نمبر بابر اعظم کا ہے اس کے بعد ویرات کوہلی اور پھر اسٹیو اسمتھ آتے ہیں۔
انہوں نے کہا کہ بابر اعظم کور ڈرائیو بہت خوبصورت کھیلتا ہے۔
پروگرام میں ایک مداح نے شاہد آفریدی سے ورلڈ کپ 2024 کے لیے اوپننگ پلیئر سے متعلق سوال کیا جس پر انہوں نے کہا کہ 2024 کا ٹی 20 ورلڈ کپ ابھی دور ہے لیکن محمد رضوان اور بابر اعظم کی کارکردگی جتنی بہترین رہی ہے میرے خیال میں یہی اوپننگ جوڑی ہونی چاہیے۔
واضح رہے کہ سوشل میڈیا پر بھی بابر اعظم اور ویرات کوہلی کی کور ڈرائیو پر مداح بحث و مباحثہ کرتے رہتے ہیں۔
