پاکستان کرکٹ ٹیم کے سابق کپتان شاہد خان آفریدی نے متنازع سوال دہرائے جانے پر ایک بھارتی صحافی کو جھاڑ پلاتے ہوئے شٹ اپ کال دے دی۔
اے آر وائی نیوز کے مطابق قطر میں کھیلی گئی لیجنڈ لیگ کا ٹائٹل جیتنے کے بعد فاتح ٹیم ایشیا الیون کے کپتان شاہد خان آفریدی جب میڈیا سے بات چیت کرنے آئے تو بھارتی صحافی نے روایتی انداز اختیار کرتے ہوئے متنازع سوال کیے۔
شاہد آفریدی نے مقبوضہ کشمیر سے متعلق پوچھے گئے ایک سوال کے جواب میں کہا کہ حقیقت سے آنکھیں نہیں پھیر سکتے، ظلم جہاں بھی ہوگا میں بولوں گا۔
اس موقع پر بھارتی صحافی نے متنازع سوال دہرائے تو آفریدی غصے میں آگئے اور مذکورہ صحافی کو جھاڑ پلاتے ہوئے شٹ اپ کال دے دی۔
سابق قومی کپتان نے واضح کیا کہ میں یہاں کرکٹ کھیلنے آیا ہوں اور کوئی تنازع نہیں چاہتا۔
واضح رہے کہ قطر میں کھیلی گئی لیجنڈ لیگ میں شاہد آفریدی کی زیر قیادت ایشیا الیون نے ورلڈ جائنٹس کو 7 وکٹوں سے شکست دے کر ٹائٹل اپنے نام کیا۔
