کراچی: شہر قائد کے علاقے کلفٹن میں سی ویو پر واقع ایک برگر چَین پر فائرنگ میں بلوچستان کی ایک سیاسی شخصیت ملوث نکلی ہے۔
تفصیلات کے مطابق کلفٹن ڈویژن پولیس نے آج کراچی کے علاقے ڈیفنس میں ایک سیاسی شخص کے گھر پر چھاپا مارا، پولیس نے چھاپے کے دوران شاہ زین مری کے سیکیورٹی گارڈ کو گرفتار کر لیا۔
پولیس ذرائع کا کہنا ہے کہ بلوچستان کے علاقے کوہلو سے تعلق رکھنے والے شاہ زین مری نے مبینہ طور پر نشے کی حالت میں برگر کا آرڈر کیا تھا لیکن آرڈر میں تاخیر پر اس نے نشے کی حالت میں منیجر پر فائرنگ کر دی۔
پولیس حکام کے مطابق چھاپا مارنے والی پولیس کی ٹیم شاہ زین مری کی رہائش گاہ کے دروازے پر چڑھ کر اندر داخل ہوئی، تاہم وہ گھر پر موجود نہیں تھے۔
سی ویو : ریسٹورنٹ میں نامعلوم شخص کی اندھا دھند فائرنگ سے منیجر زخمی
پولیس اہل کاروں نے شاہ زین کے ایک سیکیورٹی گارڈ غلام قادر کو حراست میں لے لیا ہے، ذرائع کا کہنا ہے کہ اس آپریشن میں پولیس کی بھاری نفری نے حصہ لیا۔
