سابق وفاقی وزیر داخلہ شیخ رشید احمد نے ایک بار پھر پیشگوئی کی ہے کہ یہ ہفتہ بڑا اہم ہے اور اس میں اہم فیصلے ہونے ہیں۔
اے آر وائی نیوز کے مطابق سابق وفاقی وزیر داخلہ شیخ رشید احمد نے میڈیا سے سپریم کورٹ کی جانب سے خصوصی عدالت، ہائی پروفائل اور نیب کیسز میں تفتیشی افسران کے تبادلے روک دینے کے حکم پر اے آر وائی نیوز سے خصوصی گفتگو کرتے ہوئے کہا ہے کہ یہ صرف اپنے کیسز ٹھیک کرانے آئے ہیں، یہ ہفتہ بڑا اہم ہے اس میں اہم فیصلے ہونے ہیں۔
شیخ رشید احمد نے کہا کہ اس حکومت نے آتے ہی ثنااللہ عباسی کو ہٹایا، انھوں نے تمام کیسز کی فائلوں کو بھی بدلا، پراسیکیوٹرز نے عدالت میں کہا کہ ہمیں اس کیس میں دلچسپی نہیں، پچھلے 8 دن سے کہہ رہا ہوں یہ فائلیں بدل رہےہیں۔
— Sheikh Rashid Ahmed (@ShkhRasheed) May 19, 2022
انہوں نے مزید کہا کہ جب پیشی کا وقت آتا ہے تو شہباز شریف کے چک پڑجاتی ہے، خود رانا ثنااللہ نے پچھلی پیشی پر فرد جرم عائد نہ ہونے دی، انھوں نے اعلیٰ حلقوں سے ڈیڑھ سال کی گارنٹی مانگی ہے کہ مدد کی جائے۔
واضح رہے کہ گزشتہ روز سپریم کورٹ نے عدالتوں میں جاری کیسز میں اعلیٰ حکومتی شخصیات کی جانب سے مداخلت پر از خود نوٹس لیا تھا، جس کی سماعت کرتے ہوئے آج عدالت نے اہم حکم جاری کیا ہے۔
کیس کی سماعت کرتے ہوئے سپریم کورٹ نے خصوصی عدالت، ہائی پروفائل اور نیب کیسز میں تفتیشی افسران کے تبادلے روک دیے ہیں۔
مزید پڑھیں: سپریم کورٹ نے خصوصی عدالت، ہائی پروفائل اور نیب کیسز میں تبادلے روک دیے
سپریم کورٹ نے ایف آئی اے، نیب پراسیکویشن اور تفتیشی ریکارڈ سیل کرنے کا بھی حکم جاری کر دیا ہے، نیز نیب اور ایف آئی اے کو حکم دیا گیا ہے کہ تا حکم ثانی وہ کوئی بھی کیس عدالتی فورم سے واپس نہ لیں۔
