اسرائیلی فوج نے دعویٰ کیا ہے غزہ سے تین اسرائیلی یرغمالیوں کی لاشیں ملی ہیں جنہیں حماس نے 7 اکتوبر کے حملے کے دوران یرغمال بنایا تھا۔ ان میں جرمن نژاد اسرائیلی شانی لوک کی لاش بھی شامل ہے۔
غیر ملکی خبر رساں ادارے ایسوسی ایٹڈ پریس کی رپورٹ میں کہا گیا ہے کہ ایک پک اپ ٹرک کے پیچھے پڑی 22 سالہ شانی کی لاش کی تصویر نے دنیا بھر کی توجہ حاصل کر لی۔
رپورٹس کے مطابق فوج نے دیگر دو لاشوں کی شناخت کی جو ایک 28 سالہ خاتون امیت بوسکیلا اور ایک 56 سالہ شخص اسحق جیلیرنتر کے نام سے ہوئی ہے۔
اسرائیلی فوج کے ترجمان ریئر ایڈمرل ڈینئل ہگاری کا کہنا ہے کہ تینوں کو حماس نے نووا میوزک فیسٹیول، جو غزہ کی سرحد کے قریب ایک آؤٹ ڈانس پارٹی تھی، میں قتل کیا اور ان کی لاشیں فلسطینی علاقے میں لے گئے۔
اسرائیل فوج کے مطابق 100 کے قریب یرغمالی غزہ میں اب بھی قید ہیں اور 30 کے قریب لاشیں بھی موجود ہیں۔
اسرائیلی فوج کی نصیرات کیمپ پر بمباری، 4 فلسطینی شہید
دوسری جانب غزہ کی وزارت صحت کا کہنا ہے کہ اسرائیلی بربریت کے باعث اب تک 35ہزار سے زائد فلسطینی جام شہادت نوش کرچکے ہیں۔
