شارجہ: ادارہ اسلامی امور کی جانب سے شارجہ کے مختلف علاقوں میں 30 نئی مساجد کھول دی گئیں۔
عرب میڈیا کے مطابق شارجہ کے ادارہ اسلامی امور کی جانب سے شارجہ کے مختلف علاقوں میں یکم رمضان کو 30 نئی مساجد کھول دی گئی ہیں، نئی مساجد فن تعمیر کا شکار ہیں جہاں نمازیوں کو جدید ترین سہولتیں فراہم کی گئی ہیں۔
رپورٹ کے مطابق ان نو تعمیر شدہ مساجد کا مقصد رمضان میں عبادت گزاروں کی بڑی تعداد کو پیش نظر رکھ کر انہیں جگہ کی تنگی کے احساس کے بغیر نماز کی سہولت فراہم کرنا ہے۔
ادارہ اسلامی امور کے رہنما الخیل کا کہنا تھا کہ رمضان المبارک میں تراویح اور تہجد میں بھی نمازیوں کی بڑی تعداد مساجد کا رخ کرتی ہے، عام دنوں کے مقابلے میں یہ تعداد بہت زیادہ ہوتی ہے، اس کے علاوہ رمضان المبارک کے آخری عشرے میں اعتکاف کے لیے جگہ تنگ ہوتی ہے ان نئی مساجد کے باعث معتکفین کو آسانی ہوگی۔
مزید پڑھیں: یواےای کی مساجد میں بغیر اجازت مذہبی تقریبات کا انعقاد غیر قانونی قرار
انہوں نے کہا کہ نئی مساجد میں شاندار قالین بچھائے گئے ہیں، گرمی کی شدت سے بچنے کے لیے ایئرکنڈیشنرز اور پارکنگ کی جگہ کی مختص کی گئی ہے۔
شارجہ کے رہائشیوں نے رمضان میں حکومت کی جانب سے نئی مساجد کی سہولت فراہم کرنے پر شکریہ ادا کیا ہے اور امید ظاہر کی ہے کہ اس سے عبادت گزاروں کو اکثر مقامات پر جگہ کی تنگی کا سامنا نہیں کرنا پڑے گا۔
