کراچی : سندھ ہائیکورٹ نے رپورٹرز کو عدالتی رپورٹنگ کی اجازت دیتے ہوئے پیمرا کے نوٹیفکیشن میں پابندی سے متعلق شقوں پر عملدرآمد روک دیا۔
تفصیلات کے مطابق سندھ ہائی کورٹ میں پیمرا کی جانب سے عدالتی کارروائی کی کوریج پر پابندی کے خلاف درخواست کی سماعت ہوئی۔
عبدالمعیز جعفری ایڈووکیٹ نے کہا کہ پیمرا چینلز کو اس قسم کی ہدایات جاری کرنے کا مجاز نہیں، کس کارروائی کی کوریج ہوگی اور کس پر پابندی ہوگی یہ فیصلہ عدلیہ کااختیار ہے۔
چیف جسٹس سندھ ہائیکورٹ کا کہنا تھا کہ کورٹ رپورٹرز کو بھی عدالتی رپورٹنگ میں ذمہ داری کا مظاہرہ کرنا چاہیے، یہ بھی حقیقت ہے بعض ریمارکس نشرہونے سے غلط تاثر چلا جاتاہے۔
سندھ ہائی کورٹ نے عدالتی کارروائی نشر کرنے کی اجازت دیتے ہوئے پیمرا کے نوٹیفکیشن میں پابندی سےمتعلق شقوں پر عمل درآمد روک دیا۔
سندھ ہائیکورٹ نے پیمرا، وزارت اطلاعات و دیگر کو نوٹس جاری کرتے ہوئے 6جون تک جواب طلب کرلیا۔