ماہ رمضان میں خواتین کی ہر ممکن کوشش ہوتی ہے کہ وہ اپنے اہل خانہ کو صحت بخش اور ذائقے دار پکوان بنا کر کھلائیں۔
اس حوالے سے آج ہم آپ کیلئے تھوڑا مختلف لے کر آئے ہیں تاکہ آج کے افطار دسترخوان پر کوئی نئی چیز موجود ہو جسے دیکھ روزہ داروں کو بھی خوشگوار احساس ہو۔
آج کی ڈش خاص ہے جس کا نام ’’شیش تاؤ‘‘ ہے، جس کو بنانے کی آسان ترکیب ملاحظہ کیجئے، اس کے اجزاء میں مندرجہ ذیل اشیاء درکار ہیں۔
بکرے کی ران کا گوشت ایک کلو، گھی ایک کپ، پسا ہوا گرم مسالہ حسب ذائقہ، لیموں 4 عدد، سرکہ دو چمچ، لال مرچ اور نمک دو چمچ، ٹماٹر آدھا پاؤ، پیاز (بڑے ٹکڑوں میں کٹی ہوئی) آدھا کلو۔
بنانے کا طریقہ :
گوشت کے پتلے پتلے اور مختصر پارچے کاٹ لیں، لیموں کے رس میں پسا ہوا گرم مسالہ، سرکہ، مرچ اور نمک ملا دیں۔
اس مرکب کو گرم گھی میں ڈالیں اور چمچے سے خوب اچھی طرح ہلائیں، اب اس میں گوشت کے ٹکڑے ڈالیں اور انہیں چھ سات گھنٹے تک ریفریجریٹر میں رکھا رہنے دیں۔
بعد ازاں گوشت نکال لیں اور ہر ٹکڑے کے آگے پیچھے پیاز اور ٹماٹر کا ایک ایک ٹکڑا لگا دیں اور سیخوں پر چڑھا کر کوئلوں کے اوپر جالی رکھ کر سینکیں اور لیموں لگا کر پیش کریں۔
کیا آپ جانتے ہیں کہ شیش تاؤ کیا ہے اور یہ کہاں کا خاص پکوان ہے؟ یہ ایک شامی پکوان ہے، شامی زبان میں شیش کا معنی وہ سلائی ہے جس پر سیخ چڑھائی جاتی ہے جبکہ طاووق کا معنی مرغی کا گوشت اور عربی زبان میں تیز آنچ ہے۔
