The news is by your side.

گرفتار اداکار شیزان خان سے متعلق وکیل نے بڑا خدشہ ظاہر کر دیا

نئی دہلی: تنیشا شرما خود کشی کیس میں گرفتار اداکار شیزان خان سے متعلق ان کے وکیل نے بڑا خدشہ ظاہر کرتے ہوئے کہا ہے کہ ان کا مؤکل جیل میں خود کشی کر سکتا ہے۔

تفصیلات کے مطابق بھارتی ٹی وی اداکارہ تُنیشا شرما کیس میں گرفتار اداکار شیزان خان کے وکیل نے اپنے مؤکل کے لیے جیل میں سیکیورٹی اور ذہنی مسائل کی دیکھ بھال کے لیے کاؤنسلر کی درخواست دے دی۔

واضح رہے کہ پولیس نے تحقیقات کے لیے 30 دسمبر تک اداکار شیزان خان کا جسمانی ریمانڈ حاصل کر لیا ہے۔

وکیل شیلندر مشرا نے عدالت کے باہر میڈیا سے گفتگو کرتے ہوئے کہا کہ شیزان کی دماغی حالت اس وقت کیا ہے، یہ نہ میں سمجھ سکتا ہوں نہ آپ لوگ۔ وکیل نے کہا کہ ’’کچھ روز قبل شیزان کے ساتھ جیل میں موجود ایک شخص نے خودکشی کی تھی، جس کا اثر شیزان پر بھی پڑا ہے۔‘‘

شیلندر مشرا نے کہا ہم نے شیزان کے لیے کاؤنسلر مانگا ہے، اس کے علاوہ سیکیورٹی بھی طلب کی ہے تاکہ اس پر نظر رکھی جا سکے اور اسے اکیلا نا چھوڑا جائے۔

تنیشا شرما خودکشی کیس: دوست کا جوڈیشل ریمانڈ، بہن کا بیان سامنے آگیا

وکیل کو خدشہ ہے کہ اداکار شیزان نے اپنی پوری زندگی میں نہ جیل دیکھی ہے نہ عدالت، اور اس پر بے بنیاد الزامات کی بوچھاڑ کی گئی ہے، اس لیے وہ کوئی انتہائی قدم اٹھا سکتا ہے۔

یاد رہے کہ تُنیشا شرما نے 24 دسمبر کو ’علی بابا: داستان کابل‘ نامی ڈرامے کے سیٹ پر 20 برس کی عمر میں خود کشی کر لی تھی، تنیشا ساتھی اداکار شیزان کے میک اپ روم کے واش روم میں مردہ پائی گئی تھیں۔

Comments

یہ بھی پڑھیں