نئی دہلی: بھارت میں 20 سالہ اداکارہ تنیشا شرما کی خودکشی کیس میں ان کے دوست شیزان خان کو 14 روز کے جوڈیشل ریمانڈ پر جیل بھیج دیا گیا جس کے بعد ان کی بہن کا ردعمل سامنے آگیا۔
سوشل میڈیا پر شیئر کی گئی اپنی تحریری پوسٹ میں شیزان خان کی بہن فلک ناز کا کہنا تھا کہ ہماری خاموشی کو ہماری کمزوری سمجھ لیا گیا ہے، کسی معاملے کی رپورٹنگ کرنے سے پہلے میڈیا کی تحقیق کہاں گئی؟
فلک کا کہنا تھا کہ عام لوگوں کا کامن سینس کہاں ہے؟ شیزان خان کو مورد الزام ٹھہرانے والے افراد اپنے آپ سے سوال کریں کہ کہیں وہ مذہب کی بنیاد پر شیزان کو نشانہ تو نہیں بنا رہے۔
انہوں نے لکھا کہ بعض میڈیا آؤٹ لیٹس اور افراد اس غلط بیانیے کو سمجھ رہے ہیں، ہمیں ایسے لوگوں کی ضرورت ہے، وقت نے دکھا دیا ہے کہ نفرت کی بنیاد پر کسی انسان کو بدنام کرنے کے لیے لوگ کہاں تک جاسکتے ہیں۔
خیال رہے کہ تنیشا شرما نے 24 دسمبر کو شوٹنگ کے دوران سیٹ کے میک اپ روم میں پنکھے سے لٹک کر خودکشی کرلی تھی۔
پولیس نے خودکشی کیس میں اداکارہ کے سابق بوائے فرینڈ شیزان خان کو حراست میں لیا تھا، میڈیا رپورٹس کے مطابق دونوں کا 15 روز قبل ہی تعلق ختم (بریک اپ) ہوا تھا۔
بھارتی میڈیا کا کہنا ہے کہ شیزان نے اداکارہ سے شادی کا وعدہ کر رکھا تھا تاہم اس نے وعدہ خلافی کی اور تعلق ختم کرلیا جس سے دلبرداشتہ ہو کر اداکارہ نے انتہائی قدم اٹھا لیا۔
