اسلام آباد: وزیر اعظم شہباز شریف اور نائب وزیر اعظم اسحاق ڈار نے ڈونلڈ ٹرمپ کو امریکی صدر کا عہدہ سنبھالنے پر مبارکباد پیش کر دی۔
دفتر خارجہ کے ترجمان شفقت علی خان نے بتایا کہ وزیر اعظم شہباز شریف 20 جنوری کو امریکی صدر ڈونلڈ ٹرمپ کو مبارکباد کا خط لکھا۔
ڈونلڈ ٹرمپ نے 20 جنوری 2025 کو ایک بار پھر امریکی صدر کے عہدے کا حلف لیا۔ حلف برداری کی تقریب میں دنیا بھر سے مہمانوں نے شرکت کی تھی۔
یہ بھی پڑھیں: ’ٹرمپ پاکستان سے اچھے تعلقات کی خواہاں ہیں‘
حلف برداری کی تقریب میں وفاقی وزیر داخلہ محسن نقوی نے بھی شرکت کی تھی۔ بعدازاں انہوں نے امریکا میں ڈیموکریٹس اور ری پبلکن کانگریس مین تھامس رچرڈ سوازی اور جیک برگمین سے اہم ملاقات کی تھی۔ ملاقات میں امریکا میں پاکستان کے سفیر رضوان سعید شیخ بھی موجود تھے۔
ملاقات میں باہمی دلچسپی کے امور، افغانستان کی صورتحال پر بات چیت کی گئی تھی اور پاک امریکا تعلقات کو فروغ دینے پر اتفاق کیا گیا تھا جبکہ 30 اپریل کو پاکستانی کاکس کانفرنس واشنگٹن ڈی سی میں منعقد کروانے کا فیصلہ کیا گیا۔
محسن نقوی نے تھامس سوازی اور جیک برگمین کو پاکستان کے دورے کی دعوت دی تھی اور کہا تھا کہ آپ کے دورہ پاکستان سے باہمی تعلقات کو مزید مستحکم کرنے میں مدد ملے گی۔
وزیر داخلہ نے کہا تھا کہ امریکا پاکستان کا انتہائی اہم معاشی اور دفاعی شراکت دار ہے اور ہم سماجی شعبوں کی بہتری کیلیے امریکی تعاون کو قدر کی نگاہ سے دیکھتے ہیں۔
ان کا کہنا تھا کہ پاکستان امریکا کےساتھ دو طرفہ تعلقات کو خصوصی اہمیت دیتا ہے اور امریکا کے ساتھ تمام شعبوں میں مزید اشتراک چاہتا ہے۔
اس موقع پر ڈیموکریٹس سے تعلق رکھنے والے تھامس سوزی نے کہا تھا کہ پاکستان کے ساتھ تعلقات مزید مضبوط بنانے کیلیے پر عزم ہیں، جلد پاکستان کا دورہ کروں گا۔
