پشاور: مسلم لیگ ن کے صدر شہباز شریف کا کہنا ہے کہ نیب کے دباؤ سے ہمارے الیکٹ ایبلز ٹوٹ گئے، فری اینڈ فیئر الیکشن ہونے چاہیئں۔
تفصیلات کے مطابق مسلم لیگ ن کے صدر شہباز شریف بلور ہاؤس پہنچے جہاں انہوں نے ہارون بلور کی شہادت پر بلور خاندان سے تعزیت کی اور فاتحہ خوانی کی۔
شہباز شریف نے دہشت گردی کے خلاف بلور خاندان کی قربانیوں کو بھی سراہا۔
اس موقع پر میڈیا سے گفتگو کرتے ہوئے ان کا کہنا تھا کہ افواج پاکستان کے ساتھ ہر پاکستانی شہری نے جدوجہد کی ہے، دہشت گردی اور انتہا پسندی کے خاتمے کے لیے آخری حد تک جانا ہوگا۔
انہوں نے کہا کہ ملک میں امن لانے کے لیے ہمیں اپنے تمام وسائل بروئے کار لانا ہوں گے۔
شہباز شریف کا کہنا تھا کہ نگراں حکومت اور تحریک انصاف میں کوئی فرق نہیں ہے، نواز شریف کے استقبال کے لیے تیاریاں کی تھی اور ریلی بھی نکالی۔ نگراں حکومت نے بلاوجہ سینکڑوں لوگوں کو گرفتار کیا۔ نگراں حکومت کے اقدامات تحریک انصاف کے مطالبات ہیں۔
انہوں نے کہا کہ اس میں کوئی شک نہیں نگراں حکومت پی ٹی آئی 2 ہے۔ الیکشن کمیشن کو خط لکھا جس پر صرف کاغذی کارروائی کی جاتی ہے، نیب صرف مسلم لیگ ن کو دیوار سے لگانے کی کارروائی کرتی ہے، ’ہماری پیشیاں ہو رہی ہیں اور وہ کیک پیسٹریاں کھا رہے ہیں‘۔
شہباز شریف نے کہا کہ عمران خان کے گزشتہ چار پانچ روز کے تمام جلسے فلاپ ہوئے، نواز شریف بیمار اہلیہ کو چھوڑ کر پاکستان کی خاطر واپس آئے۔
انہوں نے کہا کہ نیب کے دباؤ سے ہمارے الیکٹ ایبلز ٹوٹ گئے، فری اینڈ فیئر الیکشن ہونے چاہیئں، ووٹ کا احترام کیا جائے۔ پنجاب میں پیپلز پارٹی کا راستہ روکنے کی کوشش کی جا رہی ہے۔ ’نگراں حکومت تحریک انصاف کی ہے ن لیگ کو دیوار سے لگا رہی ہے‘۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
