اسلام آباد: وزیر اعظم شہباز شریف نے وفاقی وزیر داخلہ رانا ثنا اللہ کو تمام سیاسی کارکنوں کے لیے قابلِ تقلید قرار دے دیا۔
رانا ثنا اللہ کے منشیات اسمگلنگ کیس میں بریت پر وزیر اعظم شہباز شریف نے ٹوئٹر پر جاری اپنے بیان میں کہا کہ نیازی حکومت نے مسلم لیگ (ن) کے تمام رہنماؤں کو انتقام کا نشانہ بنایا۔
وزیر اعظم نے کہا کہ رانا ثنا اللہ کا کیس سیاسی انتقام کی بدترین مثال ہے، وزیر داخلہ نے گھناؤنے الزامات کا صبر سے مقابلہ کیا، وہ تمام سیاسی کارکنوں کے لیے قابلِ تقلید ہیں۔
یہ بھی پڑھیں: رانا ثنا اللہ نے شہباز شریف کو انٹرنیشنل صادق و امین قرار دے دیا
Of all PML-N leaders targeted by Niazi regime, Rana Sanaullah's case was worst example of political persecution with the most dangerous repercussions. He braved these heinous charges & repression with patience & remained steadfast. He is an inspiration for all political workers.
— Shehbaz Sharif (@CMShehbaz) December 10, 2022
یاد رہے کہ آج انسداد منشیات کی عدالت نے رانا ثنا اللہ کو منشیات اسمگلنگ کیس میں بری کیا۔ عدالت میں رانا ثنا اللہ کے وکیل نے بریت کی درخواست پر دلائل پیش کیے جبکہ گواہان نے بتایا کہ ہم نے کسی قسم کی کوئی منشیات رانا ثنا اللہ کے پاس نہیں دیکھی اور منشیات کا جو الزام ہے ہمارے پاس کسی قسم کے ٹھوس شواہد نہیں۔
واضح رہے کہ یکم جولائی 2019 میں رانا ثنا اللہ کو منشیات اسمگلنگ کے الزام میں گرفتار کیا گیا تھا۔ بعد ازاں ان کی 24 دسمبر 2019 کو لاہور ہائی کورٹ سے ضمانت منظور ہوئی تھی۔
