پاکستان مسلم لیگ عوامی کے سربراہ شیخ رشید احمد نے کہا ہے کہ ان کا باپ بھی عمران خان کو گرفتار نہیں کر سکتا ہے۔
پی ٹی آئی چیئرمین عمران خان کی گرفتاری کے لیے اسلام آباد پولیس کے زمان پارک آمد اور نوٹس وصول کرائے جانے کے معاملے پر عوامی مسلم لیگ کے سربراہ اور سابق وفاقی وزیر شیخ رشید احمد نے کہا ہےکہ جو یہ کر رہے ہیں، ان کا دماغ خراب ہے یہ آرٹیکل 6 کی زد میں آئیں گے۔ ان کا باپ بھی عمران خان کو گرفتارنہیں کرسکتا۔
اے آر وائی نیوز پر مذکورہ معاملے پر ردعمل دیتے ہوئے سینیئر سیاستدان کا کہنا تھا کہ انہوں نے جوتیاں بھی کھانی ہیں اور منہ بھی کالا کرانا ہے۔ معاشی حالات خراب ہیں اور یہ سری لنکا کے قریب پہنچنے والے ہیں۔ یہ الیکشن کرا دیں، عمران خان بس یہی چاہتا ہے۔
میڈیا سے گفتگو کرتے ہوئے شیخ رشید احمد نے کہا کہ یہ الیکشن سے بھاگ رہے ہیں، لیکن انہوں نے 100 جوتے کھا کر الیکشن کرانے ہیں۔ ملک میں ایک ساتھ الیکشن ہونے چاہئیں۔ کل میں نے بدلا ہوا عمران خان دیکھا جو کہتا ہے آؤ بیٹھیں اکٹھا الیکشن کرائیں۔
سابق وفاقی وزیر کا کہنا تھا کہ انہیں سیاسی طور پر پاکستان میں بہت مار پڑے گی اور بھاگنے کی جگہ نہیں ملے گی۔ ان کے ڈبوں سے ووٹ نہیں کچھ اور نکلے گا، اسی لیے یہ ایمرجنسی لگانے کے بہانے ڈھونڈ رہے ہیں۔
انہوں نے کہا کہ پانچوں ججز نے کہا ہے کہ 90 دن میں الیکشن ہوں کیونکہ پاکستان کو صرف الیکشن ہی بچا سکتا ہے لیکن یہ سپریم کورٹ کے فیصلے کو بھی غلط طور پر پیش کر رہے ہیں۔ رانا ثنا اللہ الیکشن سے بھاگنے کیلیے کوئی نہ کوئی حادثہ یا جرم کرے گا
شیخ رشید نے کہا کہ ان لوگوں کی ملک چھوڑ کر بھاگنے کی پوری ٹریننگ ہے، یہ پرائیویٹ جہازوں پر باہر بھاگتے ہیں، لیکن یہ الیکشن نہیں کرائیں گے تو قوم باہر نکل آئے گی اور ان کو ایئرپورٹس سے بھاگنے نہیں دے گی۔ لیکن ان کو لانے والے انہیں بھگانے میں استعمال نہیں ہوں گے۔
سینیئر سیاستدان نے کہا کہ پاکستان گھمبیر اور انتہائی خوفناک سیاسی دہانے پر کھڑا ہے۔ 11 ماہ میں آپ نے کچھ کام کیا ہے تو بتا دیں۔ آپ کو تو لانے والے بھی پچھتائیں گے۔
یہ بھی پڑھیں: عمران خان کو گرفتار کرنے کا حکم ہے، آئی جی اسلام آباد
انہوں نے کہا کہ آج کے دور کا لیڈر عمران خان ہے۔ وہ باہر رہ کر کام تمام کر رہا ہے اندر جاکر تو اور خطرناک ہوجائے گا۔ ملک خانہ جنگی، سول نافرمانی اور چھینا جھپٹی کی طرف جا سکتا ہے۔
