پاکستان تحریک انصاف کے رہنما شبلی فراز نے وزیر داخلہ کے دھمکی آمیز بیان پر ردعمل دیتے ہوئے کہا ہے کہ رانا ثنا اللہ کی کانپیں ٹانگ رہی ہیں۔
پی ٹی آئی رہنما اور سابق وفاقی وزیر شبلی فراز نے سماجی رابطوں کی ویب سائٹ ٹوئٹر پر اپنے ردعمل کا اظہار کرتے ہوئے کہا ہے کہ اسلام آباد کے حکمران نااہل اور کرپٹ تو تھے ہی بزدل بھی ہیں۔
انہوں نے مزید کہا کہ وزیر داخلہ رانا ثنا اللہ کی کانپیں ٹانگنے لگی ہیں اور اسلام آباد کو کنٹینرز سے آراستہ کر دیا گیا ہے۔
اسلام آباد کے حکمران نااہل اور کرپٹ تو تھے ہی بزدل بھی ہیں، رانا ثناءاللہ کی "کانپیں ٹانگنے لگیں", اسلام آباد کو کنٹینرز سے آراستہ کر دیا
— Senator Shibli Faraz (@shiblifaraz) September 21, 2022
واضح رہے کہ چیئرمین تحریک انصاف عمران خان کی جانب سے لانگ مارچ کی تاریخ کا تاحال اعلان نہیں کیا گیا ہے تاہم کال کے پیش نظر وفاقی پولیس نے صوبوں سے 30 ہزار اہلکار مانگ لیے ہیں۔
ذرائع کے مطابق اسلام آباد میں پی ٹی آئی کو داخلے سے روکنے کے لیے پولیس، ایف سی، رینجرز کے علاوہ سینکڑوں کینٹرز بھی لگائے جائیں گے اور داخلی راستوں پر کنٹینرزکے ساتھ خندقیں بھی کھودی جائیں گی جب کہ وفاقی پولیس کی جانب سے اضافی آنسوں گیس شیل اور شیل پھینکنے والے ڈرونز بھی منگوائے گئے ہیں۔
دوسری جانب وزیر داخلہ رانا ثنا اللہ نے دھمکی دیتے ہوئے کہا ہے کہ عمران خان نے اگر ڈی چوک آنے کی کوشش کی تو ایسی دُھونی دیں گے کہ وہ دوبارہ اسلام آباد آنا ہی بھول جائیں گے۔
یہ بھی پڑھیں: پی ٹی آئی لانگ مارچ : رانا ثنااللہ کی عمران خان کو دھمکی
رانا ثنا اللہ نے میڈیا سے گفتگو میں عمران خان پر تنقید کرتے ہوئے کہا وہ اس وقت کسی کا لاڈلا نہیں ، ناخلف بیٹے سے تو ماں باپ بھی لاڈ نہیں کرتے، تو جو قوم کو تقسیم اور نوجوان نسل کو تباہ کر رہا ہو اس سے کون لاڈ کرتا ہے۔