اپنی تیز ترین بولنگ کے سبب دنیا بھر میں مشہور پاکستان کے سابق کرکٹر شعیب اختر بیس بال میں بھی اپنی مہارت کا مظاہرہ کرنے لگے۔
اپنی تیز ترین گیندوں سے بیٹرز کی وکٹیں اڑانے والے شعیب اختر کی بیس بال کھیلنے کی ویڈیو سامنے آئی ہے۔ متحدہ عرب امارات میں بیس بال لیگ کا آغاز ہونے جارہا ہے اور اسی سلسلے میں راولپنڈی ایکسپریس بطور بیس بال ’پچر‘ گیند تھرو کرتے نظر آرہے ہیں۔
جنوبی ایشیا اور متحدہ عرب امارات میں منعقد ہونے والی پہلی پروفیشنل بیس بال لیگ کے لیے ’بیس بال یونائیٹڈ‘ کی جانب سے شعیب اختر کو ایمبیسڈر مقرر کیا گیا ہے۔
سابق فاسٹ بولر نے دبئی کے اسٹیڈیم میں بیس بال کھیلنے کی ویڈیو اپنے سوشل میڈیا اکاؤنٹ ایکس پر شیئر کی ہے۔
انھوں نے سوشل میڈیا پلیٹ فارم ’ایکس‘ پر اپنی ویڈیو شیئر کرتے ہوئے لکھا کہ ’تاریخ رقم ہونے جا رہی ہے اب دنیا کے اس حصے میں بھی بیس بال کا آغاز ہونے جارہا ہے۔‘
انھوں نے لکھا کہ ’مجھے بیس بال یونائیٹڈ کی جانب سے پہلی ’پچ‘ کرنے کا اعزاز حاصل ہوا۔ اس کو ممکن بنانے کے لیے کاش شیخ کا بہت شکریہ۔ ساتھ ہی انھوں نے مداحوں سے پوچھا کہ کیا آپ میری رفتار کا اندازہ لگا سکتے ہیں۔‘
History being made as baseball sets foot in this part of the world and i was honored by @BaseballUnited to do the first pitch. A big thank you to @Kash_Shaikh for making this happen.
Any guesses on the speed??? pic.twitter.com/9ISD98d1Kf— Shoaib Akhtar (@shoaib100mph) November 26, 2023
واضح رہے کہ اپنی ریٹائرمنٹ کے بعد سے شعیب اختر کرکٹ کمنٹری اور چینلز پر ماہرانہ رائے دیتے نظر آتےہیں، اس کے ساتھ ان کا اپنا یوٹیوب چینل بھی ہے۔
