اسلام آباد: پارلیمنٹ ہاؤس میں جمعہ کی نماز کے دوران چور انتہائی مہارت سے قومی اسمبلی کے عملے اور صحافیوں کی جوتیاں چرا کر فرار ہوگئے۔
نمائندہ اے آر وائی نیوز نے بتایا کہ ایک درجن سے زائد افراد کی جوتیاں چوری ہوئیں، متاثرین میں قومی اسمبلی کا عملہ اور صحافی شامل ہیں۔
نمازی جب نماز سے فارغ ہو کر لوٹے تو ان کی جوتیاں غائب تھیں۔ پارلیمنٹ ہاؤس کی سکیورٹی غیر معمولی تھی لیکن اس کے باوجود چوروں نے منظم انداز میں واردات کی۔
کوشش کی گئی کہ سی سی ٹی وی کی مدد سے ملزمان کا پتا لگایا جا سکے لیکن کوئی کامیابی نہیں مل سکی۔ متاثرین مجبوراً ننگے پاؤں مسجد سے لوٹے۔
ادھر، اسپیکر قومی اسمبلی ایاز صادق نے واقعے کا سخت نوٹس لیتے ہوئے سکیورٹی عملے کی ناکامی کی تحقیقات کا حکم دے دیا۔ معاملے کی تحقیقات جوائنٹ سیکرٹری ایڈمن اور سارجنٹ ایٹ آرمز کریں گے۔
ذرائع قومی اسمبلی نے اے آر وائی نیوز کو بتایا کہ جن سکیورٹی اہلکاروں کی ڈیوٹی تھی وہ موقع موجود نہیں تھے۔
