اسلام آباد : سنی اتحاد کونسل قومی و صوبائی اسمبلیوں 77 مخصوص نشستوں سے محروم ہوگئی ، یہ نشستیں اب باقی جماعتوں کو ملیں گی۔
تفصیلات کے مطابق الیکشن کمیشن فیصلے کے بعد سنی اتحاد کونسل قومی و صوبائی اسمبلیوں کی 77 مخصوص نشستوں سے محروم ہوگئی، الیکشن کمیشن کی جانب سے ہولڈ کی گئی یہ نشستیں اب باقی جماعتوں کو ملیں گی۔
قومی اسمبلی میں خواتین کی بیس اور اقلیتوں کی تین نشستیں دیگر سیاسی جماعتوں میں تقسیم کی جائیں گی، ان میں پنجاب سے بارہ اور خیبرپختونخوا سے آٹھ خواتین کی نشستیں شامل ہیں۔
اس طرح پنجاب اسمبلی میں بھی خواتین کی چوبیس اور اقلیتوں کی تین نشستیں متناسب نمائندگی کے تحت دیگر جماعتوں کو الاٹ کی جائیں گی۔
اس کے علاوہ کے پی اسمبلی میں خواتین کی اکیس اور اقلتیوں کی چار نشستیں اور سندھ اسمبلی میں خواتین کی دو نشستیں بھی اب دیگر جماعتوں کو ملیں گی۔
یاد رہے الیکشن کمیشن نے سنی اتحاد کونسل کی مخصوص نشستوں کی درخواست مسترد کردی تھی، الیکشن کمیشن کی جانب سے جاری کردہ تحریری فیصلے میں کہا گیا تھا کہ سنی اتحاد کونسل خواتین، اقلیتی نشستوں کے کواثے کی مستحق نہیں۔
الیکشن کمیشن نے آئین کے آرٹیکل 53 کی شق 6، الیکشن ایکٹ کے سیکشن 104 کے تحت فیصلہ سنایا جبکہ الیکشن کمیشن کی جانب سے فیصلہ چار ایک کےتناسب سے جاری کیا گیا ، تحریری فیصلے میں کہا گیاتھا کہ سنی اتحاد کونسل کو مخصوص نشستیں الاٹ نہیں کی جا سکتیں۔
