راولپنڈی: پاکستان کرکٹ ٹیم کے لیگ اسپنر عثمان قادر کا کہنا ہے کہ انھوں نے زمبابوے کے بلے باز سکندر رضا کو اپنی ایک گگلی پر آؤٹ کر کے بہت لطف لیا۔
تفصیلات کے مطابق راولپنڈی کرکٹ اسٹیڈیم میں زمبابوے کے خلاف دوسرے ٹی 20 میچ میں پاکستان کی شان دار فتح کے بعد میڈیا سے گفتگو کرتے ہوئے لیگ اسپنر عثمان قادر نے کہا میں آج اپنی پرفارمنس پر خوش ہوں، گگلی پر سکندر رضا کی وکٹ لے کر بہت انجوائے کیا۔
واضح رہے کہ عثمان قادر ماضی کے قومی ٹیم کے مایہ ناز لیجنڈ لیگ اسپنر عبدالقادر مرحوم کے صاحب زادے ہیں، انھوں نے زمبابوے کے خلاف ٹی 20 میں ڈیبیو کیا تھا۔
THAT googly from Usman Qadir!#PAKvZIM | #HarHaalMainCricket
WATCH: https://t.co/f9MKWYinHO pic.twitter.com/Bc3FGuTpUt— Pakistan Cricket (@TheRealPCB) November 8, 2020
عثمان قادر نے کہا کیریئر کے پہلے میچ میں کھلاڑی نروس ہوتا ہے، تاہم منیجمنٹ نے دوسرے میچ میں مجھے اعتماد دیا، منیجمنٹ نے پہلے میچ کے بعد میری غلطیوں کی نشان دہی کی، اس لیے دوسرے میچ میں بہتری نظر آئی۔
پاکستان نے زمبابوے کو شکست دے کر ٹی 20 سیریز جیت لی
یاد رہے کہ 7 نومبر کو زمبابوے کے خلاف کھیلے جانے والے پہلے ٹی 20 میچ میں عثمان قادر نے ایک ہی وکٹ لی تھی، جب کہ دوسرے ٹی ٹوینٹی میں انھوں نے چار اوورز میں 23 رنز دے کر 3 وکٹیں حاصل کیں۔
دوسرے میچ میں عثمان قادر نے ویزلے مدھیور کو 24 رنز پر ایل بی ڈبلیو کر دیا تھا، سکندر رضا ان کی گگلی پر محض 7 رنز پر کلین بولڈ ہو گئے تھے، جب ایلٹن چگمبورا کو 18 رنز پر عثمان قادر کی گیند پر محمد رضوان نے اسٹمپ کر دیا تھا۔
