کراچی: کچے کے علاقے میں ڈاکوؤں کی سرکوبی کے لیے سندھ پولیس کے دستے میں 2 جدید ترین آرمرڈ پولیس موبائلز کا اضافہ کیا گیا ہے۔
تفصیلات کے مطابق کچے کے علاقے میں کافی عرصے سے ڈاکوؤں اور جرائم پیشہ عناصر کے خلاف پولیس کارروائیاں جاری ہیں، ان مقابلوں میں کئی افسران اور جوان جام شہادت نوش کر چکے ہیں، اس بات کو مد نظر رکھتے ہوئے سندھ پولیس کی جانب سے جدید آرمرڈ پولیس موبائلیں تیار کروائی گئی ہیں۔
جدید ترین آرمرڈ پولیس موبائلز میں سے ایک کشمور اور دوسری شکارپور پولیس کو دے دی گئی ہے، آئی جی سندھ غلام نبی میمن کا کہنا ہے کہ جدید پولیس موبائل بڑے بور کا ہتھیار روکنے کی صلاحیت رکھتی ہے۔
انھوں نے کہا جہاں مسائل چل رہے ہیں وہاں پولیس میں اپگریڈیشن جاری ہیں، کچے میں کئی مقامات پر رینج کا بھی فرق ہوتا ہے، پولیس موبائل میں 6 اہلکار پیچھے 2 آگے بیٹھ سکتے ہیں، جب کہ جدید پولیس موبائل میں ایک ٹاور بھی بنایا گیا ہے، چار اہلکار سائیڈ سے ایک کھڑا ہو کر فائرنگ کر سکتا ہے۔
کراچی پولیس کی پُھرتی : چھینی گئی کار چند گھنٹوں میں کیسے ملی؟
غلام نبی میمن کے مطابق ٹاور کے ذریعے اوپر سے مانیٹرنگ بھی کی جا سکتی ہے، موبائل کو چاروں جانب سے مکمل طور پر کور کیا گیا ہے، جوان گشت پر ہوں اور حملہ ہو جائے تو مقابلے میں آسانی ہوگی۔
انھوں نے کہا فی الحال ٹرائل بیسز پر دو پولیس موبائلیں لی گئی ہیں، اگر یہ تجربہ کامیاب ہوا تو مزید ضلعوں کو بھی یہ موبائلیں دیں گے۔
