کراچی: وردی، تھانہ، گاڑی اور تنخواہ سرکار کی دی ہوئی، لیکن پولیس کانسٹیبلز پورا وقت ٹک ٹاک پر صرف کرنے لگے ہیں۔
کراچی پولیس کے خواتین اور مرد اہلکار دوران ڈیوٹی فرائض چھوڑ کر سرکاری یونیفارم میں، سرکاری املاک، تھانوں، پولیس موبائل اور اسلحے کا بے دریغ استعمال کرنے لگے ہیں، ایڈیشنل آئی جی کراچی نے اس پر سخت نوٹس لے لیا ہے۔
اے آئی جی کراچی عمران یعقوب منہاس نے کراچی پولیس میں ٹک ٹاک بنانے والے اہلکاروں کو سخت پیغام جاری کر دیا ہے، انھوں نے کہا کہ سرکار نے یہ وردی دی جسے پہن کر سرکاری امور انجام دینے ہیں، نہ کہ اسے پہن کر ہم اپنی ذاتی تشہر کی جائے۔
انھوں نے کہا دوران ڈیوٹی یونیفارم پہن کر ٹک ٹاک بنانا مناسب نہیں ہے، ایک کانسٹیبل کو ٹک ٹاک بنانے پر سی پیک بھیج دیا گیا، ایک خاتون کانٹسیبل کو وارننگ اور سینشور دیا گیا، جب کہ ایک ڈی ایس پی نے بھی کیا گو کہ اس کی نیت غلط نہیں لیکن عمل غلط تھا، اس ڈی ایس پی کو بھی ایک وارننگ جاری کی گئی۔
کراچی پولیس چیف نے کہا میرا میسج پوری کراچی پولیس کے لیے ہے، وردی پہن کر ٹک ٹاک بنانا غیر پیشہ ورانہ عمل ہے، جیسے ہی نوٹس میں یہ بات آئی محکمہ جاتی کارروائی کی جائے گی۔
