ریاض: سعودی عرب میں سندھی کلچر ڈے کی مناسبت سے رنگارنگ تقریب کا اہتمام ہوا جس میں سندھ کی ثقافت کو بھرپور انداز میں پیش کیا گیا۔
تفصیلات کے مطابق سعودی عرب میں سندھی کلچرل ڈے کی مناسبت سے منعقدہ تقریب میں لوک گیتوں نے سندھی کلچر کا خوب رنگا جمایا۔
سعودی دارالحکومت ریاض میں انڈس کلچرل اینڈ سوشل فورم کی جانب سندھی کلچر ڈے کی تقریب منعقد ہوئی، رنگا رنگ کلچرل ڈے میں بچوں نے سندھی لباس پہن کر کلچرل ڈے کے معروف گانے پر رقص کیا۔
تقریب میں نامور سندھی فوک گلوکار طفیل سنجرانی نے بھی اپنی آواز کا جادو جگایا اور سندھی اردو اور پنجابی گانے گا کر جہاں لوگوں کے دلوں کو موہ لیا وہیں منچلوں نے بھی خوب رقص کیا۔
فورم کے صدر ذیشان قاضی نے تقریب سے خطاب کرتے ہوئے کہا کہ یقیناً وہ قومیں ہمیشہ زندہ جاوید رہتی ہیں جو اپنی ثقافت کے ساتھ جڑی رہتی ہیں۔
دوسری جانب سفارت خانہ پاکستان کے ویلفئیر اتاشی عبدالشکور شیخ کا کہنا تھا کہ سندھ کا کلچر پورے پاکستان کی نمائندگی کرتا ہے اور اس طرح کی تقریبات دنیا بھر کو یہ پیغام دیتی ہیں کہ پاکستان ایک امن پسند ملک ہے۔
علاوہ ازیں تقریب سے رشید سرکی، عبدالقادر ملاح اور دیگر نے بھی سندھ کلچر ڈے پر روشنی ڈالی۔
