The news is by your side.

Advertisement

سندھی زبان کے معروف ادیب، شاعر اور ماہرِ ثقافت ممتاز مرزا کی برسی

ممتاز مرزا سندھی زبان کے معروف ادیب، شاعر، ماہرِ ثقافتِ سندھ اور لوک موسیقی، محقق تھے جنھوں نے شاہ عبداللطیف بھٹائی کے مجموعہ کلام رسالہ کے قدیم ترین نسخے کو مرتب کر کے شایع کروایا۔

ممتاز مرزا 1939ء کو حیدرآباد، سندھ میں پیدا ہوئے۔ ان کا اصل نام مرزا توسل حسین تھا جو مرزا قلیچ بیگ، مرزا اجمل بیگ اور مرزا بڈھل بیگ کے ذی علم گھرانے سے تعلق رکھتے تھے۔ ان کے والد بھی سندھ کے معروف شاعروں میں شمار ہوتے ہیں۔

ممتاز مرزا نے اپنی علمی زندگی کا آغاز سندھی ادبی بورڈ سے کیا جہاں انہیں لغات اور سندھی لوک ادب کی تدوین کا کام سونپا گیا۔ وہ ریڈیو پاکستان اور پاکستان ٹیلی وژن سے وابستہ بھی رہے۔

عمر کے آخری حصے میں سندھ کے محکمہ ثقافت کے ڈائریکٹر جنرل مقرر ہوئے جہاں انھوں نے شاہ عبداللطیف بھٹائی کے مجموعہ کلام رسالہ کا قدیم ترین نسخہ گنج کے نام سے مرتب کرکے اپنی نگرانی میں شایع کروایا جو ان کا بڑا کارنامہ ہے۔

ممتاز مرزا سندھی زبان کے اعلیٰ پائے کے نثر نگار تھے۔ ان کی متعدد تصانیف سندھی ادب کا سرمایہ ہیں۔

حکومتِ پاکستان نے ممتاز مرزا کی علمی و ادبی خدمات اور سندھی ثقافت کے فروغ کا اعتراف کرتے ہوئے 1997ء میں بعد از مرگ انھیں صدارتی تمغہ برائے حسنِ کارکردگی عطا کیا تھا۔

ممتاز مرزا 6 جنوری 1997ء کو وفات پا گئے تھے۔ وہ حیدرآباد میں ٹنڈو آغا کے قبرستان میں آسودہ خاک ہیں۔

Comments

یہ بھی پڑھیں