بدین : امیر جماعت اسلامی سراج الحق نے کہا ہے کہ سندھ کی ترقی میں سب سے بڑی رکاوٹ پیپلزپارٹی ہے،حکمران طبقہ ہی بجلی اور ٹیکس چوری میں ملوث ہے۔
ان خیالات کا اظہار انہوں نے بدین میں جلسہ عام سے خطاب کرتے ہوئے کیا، انہوں نے کہا کہ سندھ کے حکمرانوں کی ملکیت میں اضافہ ہورہا ہے اورغریب روٹی کو بھی ترس رہے ہیں۔
سراج الحق کا کہنا تھا کہ سندھ کے حقوق کیلئے بلاول ہاؤس اور وزیراعلیٰ ہاؤس کی جانب مارچ کرینگے، 2022میں سندھ کے وسائل کو تب بھی لوٹا گیا جب عوام سیلاب سے متاثر تھے۔
انہوں نے کہا کہ اس فرسودہ نظام کی تبدیلی تک سندھ کی ترقی ممکن نہیں، عوام کو بیدار ہونا پڑے گا اور اپنے حق کے لئے بھرپور آواز اٹھانی پڑے گی۔
امیر جماعت اسلامی نے اپنے خطاب میں کہا کہ آج سندھ کا پڑھا لکھا نوجوان نوکری کیلئے سیاسی سفارش کا محتاج ہے آخر کیوں؟ حکمرانوں کے رویے سے عوام میں مایوسی بڑھتی جا رہی ہے۔
سراج الحق نے کہا کہ چالیس چوروں کو جیل جانا پڑے گا یہ سیاست نہیں کریں گے، ہم نے وزارت کے بعد خود کو احتساب کے لیے پیش کیا، لوگوں کے سامنے کہا کہ خود کو آپ کے سامنے احتساب کے لیے پیش کرتا ہوں۔
انہوں نے کہا کہ ان سب لوگوں نے مل کر توشہ خانہ کو لوٹا ہے، یہی وہ لوگ ہیں جنہوں نے آج تک افغٖانستان کو تسلیم نہیں کیا، سندھ میں پیپلزپارٹی اور کے پی میں پی ٹی آئی حکومت ہے وہاں بھی کرپشن عام ہے۔
اپنے خطاب میں ان کا مزید کہنا تھا کہ عدالت نے فیصلہ کیا کہ اسلام آباد میں 31تاریخ کو الیکشن ہونا چاہیے لیکن ان لوگوں نے عدالت کے فیصلے کا بھی احترام نہیں کیا۔
