لاہور : امیر جماعت اسلامی سینیٹر سراج الحق نے پاکستان مسلم لیگ (ق ) کے صدر چوہدری شجاعت حسین کو فون کیا، دونوں رہنماؤں نے ملک کی موجودہ صورتحال اور باہمی دلچسپی کے امور پر تبادلہ خیال کیا۔
اس حوالے سے ذرائع کا کہنا ہے کہ چوہدری شجاعت حسین نے ملک میں جاری سیاسی بحران پر امیر جماعت اسلامی کی کوششوں کو سراہا اور ان کی تعریف کی۔
دوران گفتگو سراج الحق نے چوہدری شجاعت کو عید کی مبارک باد دی اور ان خیریت دریافت کی، ان کا کہنا تھا کہ موجودہ سیاسی صورتحال میں چوہدری شجاعت کردار ادا کریں۔
امیر جماعت اسلامی نے کہا کہ چوہدری شجاعت حسین واحد سیاستدان ہیں جن کے کردار پر کوئی داغ نہیں، ہماری خواہش ہے کہ ملک بھر میں الیکشن ایک ہی دن کرانے کیلئے چوہدری شجاعت اپنا کردار ادا کریں۔
اس موقع پر چوہدری شجاعت حسین نے کہا کہ میں خود بھی یہی چاہتا ہوں کہ تمام صوبائی اسمبلیوں کے الیکشن ایک ہی دن ہوں، صرف پنجاب میں الیکشن ہونے سے جو بھی وزیراعلیٰ بنے گا وہ بادشاہ بن کر رہ جائے گا۔
ق لیگ کے سربراہ نے کہا کہ جو صوبہ پنجاب کا وزیراعلیٰ بنے گا وہ دیگر انتخابات میں بھی اپنا اثر و رسوخ استعمال کرے گا، اس طرح ملک میں افراتفری پیدا ہوگی۔
چوہدری شجاعت نے کہا کہ پرویزالہٰی سراج الحق کے سامنے پی ٹی آئی کا مؤقف دیں گے، پاکستان مسلم لیگ کا مؤقف صرف میں ہی دے سکتا ہوں اور میرا مؤقف ملک و قوم کے وسیع تر مفاد میں ہے۔
