اسلام آباد : ارشد شریف کیس میں اسپیشل جے آئی ٹی نے ڈی آئی جی سی ٹی ڈی اہم معلومات حاصل کرلیں، ساتھ ہی نیشنل پولیس بیورو کے بیلسٹک اور فرانزک ایکسپرٹ سے تمام پہلوؤں پر ماہرانہ رائے لی۔
تفصیلات کے مطابق ارشد شریف کیس میں اسپیشل جے آئی ٹی کا چھٹا اجلاس ہوا ، اسپیشل جے آئی ٹی نے ڈی آئی جی سی ٹی ڈی کےپی جاویداقبال سے معلومات حاصل کیں۔
اجلاس میں نیشنل پولیس بیورو کے بیلسٹک اور فرانزک ایکسپرٹ سے مشاورت سمیت تمام پہلوؤں پر ماہرانہ رائے لی گئی۔
جےآئی ٹی نے پوسٹمارٹم بورڈ کے چند ڈاکٹرز سے دوبارہ کچھ سوالات کے جوابات لیے جبکہ اگلے اجلاس کے لیے اہم گواہان کو طلب کیا گیا، جس میں ان کے بیانات قلمبند کیےجائیں گے۔
گذشتہ روز شہید ارشد شریف کیس میں اسپیشل جے آئی ٹی کا پانچواں اجلاس ہوا تھا ، جس میں ارشد شریف کا پوسٹ مارٹم کرنیوالی پمز کی ٹیم بھی شریک ہوئی۔
اجلاس میں پمز اسپتال ٹیم کی جانب سے پوسٹ مارٹم کے حوالے سے بریفنگ دی گئی، جس کے بعد اسپیشل جے آئی ٹی نے ڈاکٹروں کی ٹیم کے بیانات بھی ریکارڈ کئے۔
اجلاس میں پوسٹ مارٹم کے وقت لی جانیوالی تصاویر بھی جے آئی ٹی کے حوالے کی گئیں۔
پمز اسپتال اور میڈیکل ڈائریکٹر پمز بھی جے آئی ٹی میں پیش ہوئے، جن سے اسپیشل جے آئی ٹی کی جانب سے ایک گھنٹے تک سوالات کئے گئے۔
اسپیشل جے آئی ٹی کی جانب سے فیکٹ فائنڈنگ کمیٹی کو بھی خط لکھ دیا گیا، جس میں جےآئی ٹی نےشہید ارشد شریف کے کینیا سے ملنے والا سامان مانگا گیا تھا۔
