گلگت بلتستان : اسکردو، شگر کھرمنگ اور گانگچھے میں سیلاب سے بڑے پیمانے پر تباہی پھیل گئی درجنوں گھر بہہ گئے اہم شاہراہیں ٹوٹ پھوٹ کا شکار ہیں۔
ملک بھر میں ہونے والی حالیہ تباہ کن بارشوں کے بعد مختلف شہروں میں سیلابی صوتحال پیدا ہوگئی ہے جس کے سبب بڑے پیمانے پر عوام کا مالی نقصان ہوا ہے۔
اس حوالے سے ذرائع کا کہنا ہے کہ سیلابی ریلے کے زد میں آکر کونیس گانگچھے میں 27گھر تباہ ہوگئے، سیلابی ریلوں سے 15گھر مکمل تباہ ،گمبہ اسکردو میں بھی درجنوں مکانات متاثر ہوئے۔
اس کے علاوہ روندو میں بھی سیلاب اور لینڈ سلائیڈنگ سے رابطہ سڑکیں ،پل تباہ اور درجنوں مکانات متاثر ہوئے، دریائے مشہ بروم میں اونچے درجے کے سیلاب کا الرٹ جاری کردیا گیا۔
غورسے رائشہ میں حفاظتی بند ٹوٹ گیا، سیلابی ریلا آبادی میں داخل ہوگیا جس کے نتیجے میں تاریخی مسجد زیر آب ہوگئی۔
اسکردو میں سیلابی ریلوں کےباعث وسیع رقبے پرکھڑی فصلیں تباہ ہوگئیں، بڑی تعداد میں درخت بھی دریا برد ہوگئے۔
متاثرین نے حکومت سے متاثرہ علاقوں میں فوری ریلیف آپریشن شروع کرنے کا مطالبہ کیا ہے، وزیراعلیٰ گلگت بلتستان نے متاثرہ علاقوں میں ریسکیو اینڈ ریلیف آپریشن تیز کرنے کی ہدایت جاری کردی۔
