موسم گرما شروع ہوچکا ہے اور اس موسم میں جلد اور بالوں کو چکنائی اور پسینے سے بچا کر ان کا خیال رکھنا بے حد ضروری ہوتا ہے۔
اے آر وائی نیوز کے مارننگ شو باخبر سویرا میں ماہر امراض جلد ڈاکٹر کاشف احمد ملک نے شرکت کی اور اس موسم میں جلد کا خیال رکھنے کے طریقے بتائے۔
ڈاکٹر کاشف کا کہنا تھا کہ موسم گرما میں پسینہ ایک بڑی وجہ ہے جو جلد کو خراب کرتا ہے اور ایکنی کا سبب بھی بنتا ہے، اسے ختم کرنا ضروری نہیں لیکن ریگولیٹ کرنا ضروری ہے۔
انہوں نے کہا کہ اس کے لیے بازار میں کیلامین نامی لوشن باآسانی دستیاب ہے جو جلد کو ٹھنڈا اور نم رکھتا ہے۔
علاوہ ازیں سن بلاک ایسا استعمال کریں جو واٹر بیسڈ ہو تاکہ وہ جلد کے مساموں کو بند نہ کرے۔
وٹامن سی کی غذائی اشیا اور مصنوعات کا استعمال کریں۔
ڈاکٹر کاشف کا مزید کہنا تھا کہ سر میں پسینہ آنے کے عمل کو کم کرنے کے لیے ضروری ہے کہ روز سادے پانی سے نہایا جائے اور شیمپو ایک دن چھوڑ کر استعمال کیا جائے۔
