استور: ملک کے بالائی علاقوں میں برف باری کا سلسلہ شروع ہو گیا ہے، ضلع استورمیں شدید برفباری ہو رہی ہے، اور بالائی علاقوں میں اب تک 6 انچ تک برف پڑ چکی ہے۔
ڈی سی استور محمد ذوالقرنین کے مطابق استور میں 4 انچ، چلم 8 انچ، منی مرگ میں 6 انچ برف پڑی ہے، برزل ٹاپ پر ڈیڑھ انچ، بوبند ویل، قمری نگی، زیان اور پشواڈی میں 5 انچ برف پڑی ہے۔
شنکر گڑھ، فقیر کوٹ، میر ملک، چمروٹ، اور گھساٹ میں 3 سے 4 انچ تک برف پڑی ہے، چھوگام، ناصر آباد، اور رٹو رحمان پور میں 2 انچ تک برف پڑ چکی ہے۔ دوسری طرف ضلع استور کے زیریں علاقوں میں ایک انچ تک برف پڑی ہے۔
بالائی علاقوں سمیت بالائی سرحدی علاقوں میں برف باری کا سلسلہ جاری ہے، اور یخ بستہ ہواؤں کی وجہ سے سردی کی شدت میں اضافہ ہو چکا ہے۔
میدانی علاقوں میں ٹریفک کا نظام جزوی طور پر، جب کہ بالائی علاقوں میں ٹریفک کا نظام مکمل معطل ہو چکا ہے، ڈپٹی کمشنر استور نے ہدایت جاری کی ہے کہ برف باری کے دوران شہری غیر ضروری سفر سے اجتناب کریں۔
ڈی سی استور محمد ذوالقرنین نے بتایا کہ بالائی علاقوں کی برف سے متاثرہ سڑکوں کی بحالی کا کام شروع ہو گیا ہے، استور ویلی ہیڈکوارٹر، بالائی علاقے رٹو اور چلم روڈ کھلی ہے، چلم تا برزل ٹاپ، منی مرگ، کامری اور ڈومیل کی رابطہ سڑکیں بند ہیں، چلم سے برزل ٹاپ گلتری روڈ بھی بند ہے۔
انھوں نے کہا کہ اگر رات تک برفباری نہ ہوئی تو رابطہ سڑکیں بحال کر دیں گے، کل تک موسم صاف ہونے پر بالائی علاقوں کے زمینی راستے بحال ہو جائیں گے۔
