الیکشن سے قبل مودی سرکار نے پورے سوشل میڈیا صارفین کے خلاف مہم کا آغاز کر دیا ہے، حالیہ ڈیجیٹل دور میں مودی سرکار اپنے خلاف اٹھنے والی آوازوں کو بند کرنے کے لیے ہر ممکن کوشش کر رہی ہے، سوشل میڈیا پلیٹ فارم کو دھمکی آمیز نوٹس جاری کیے گئے۔
بھارتی میڈیا رپورٹس کے مطابق بغیر کسی نوٹس اور انتباہ کے مودی سرکار کا سوشل میڈیا پر کریک ڈاؤن کا سلسلہ جاری ہے، بھارتی اخبار بولتا ہندوستان نے لکھا کہ بغیر کسی وجہ اور نوٹس کے بھارتی وزیر اطلاعات اور نشریات کیسے کوئی حکم نامہ جاری کر سکتی ہے؟
نیشنل دستک نامی میڈیا پلیٹ فارم کو دھمکی آمیز نوٹس جاری کیا گیا، نیشنل دستک کے سی ای او شامبو کمار سنگھ نے مودی سرکار پر شدید تنقید کرتے ہوئے کہا کہ شاید ہماری غلطی یہ ہے کہ ہماری کہانیاں بھارت کے پس ماندہ لوگوں اور ذات پات کے نظام کے خلاف ہوتی ہیں۔
رواں ماہ کانگریس نے بھارتی الیکشن کمشنر کے ساتھ منسلک یوٹیوب چینلز کی پابندی پر بھی بھرپور آواز اٹھائی تھی، بھارتی اپوزیشن کانگریس کے مطابق کوئی حکومت انتخابات کے دوران ایسا کرنے کا اختیار نہیں رکھتی، مودی سرکار بی جے پی مخالف آوازیں بند کر کے سچائی کو نہیں چھپا سکتی۔
عالمی انٹرنیٹ کنیکٹیوٹی کا دعویٰ کرنے والی مودی سرکار نے گزشتہ سال 9 بار انٹرنیٹ کو بند کر کے بھارت میں ڈیجیٹل رسائی کو روکا، یہاں تک کہ فروری میں سکھ کسان احتجاج کے دوران بھی انٹرنیٹ کو بند کر دیا گیا تھا، تاکہ دنیا تک حقائق کی رسائی کو روکا جا سکے۔
مودی سرکار نے ماضی میں صحافیوں پر دہشت گردی اور کرپشن کے جھوٹے الزامات لگاتے ہوئے کارروائیاں کیں، انسانی حقوق اور آزادی صحافت کی تنظیموں نے بھی مودی کے بلا جواز کریک ڈاؤن اور انسانی حقوق کی خلاف ورزیوں پر تشویش کا اظہار کیا تھا۔
