بانسری یا ماؤتھ آرگن بجانے والے تو آپ نے بہت دیکھے ہوں گے لیکن ایک نئے انداز سے اور کنگھی کی مدد سے ماؤتھ آرگن پر سروں کو بکھیرنا شاید ہی کبھی دیکھا ہو۔
ایک ایسی ہی فنکارہ ہیں جو کنگھی کو ماؤتھ آرگن بنا کر اس سے مختلف دھنیں ترتیب دیتی ہیں، یہ ہیں فیصل آباد کی سوہا بشیر جنہوں نے یہ کارنامہ انجام دے کر سننے والوں کو حیران کردیا۔
اس حوالے سے اے آر وائی نیوز کے پروگرام باخبر سویرا میں سوہا بشیر کو مدعو کیا گیا جنہوں نے اپنے اس بے مثال ہنر سے ناظرین کو آگاہ کیا۔
سوہا نے بتایا کہ وہ گزشتہ سات سال سے یہ میوزک بجا رہی ہیں ایک دن اتفاق سے گھر بیٹھے یونہی یہ خیال آیا تو ایک کنگھی اٹھائی اور اس پر کاغذ لپیٹ کر بجایا تو دُھن بن گئی۔
انہوں کہا کہ مجھے اپنے گھر والوں نے بھی بہت سپورٹ کیا، اب میں کافی مشہور ہوچکی ہوں اور لوگ مجھے اپنی تقریبات میں بھی مدعو کرتے ہیں۔
سوہا بشیر کا کہنا تھا کہ جس طرح ہارمونیم کے کیز بنے ہوتے ہیں اور سر لے کا پتہ چلتا ہے اسی طرح کنگھی میں بھی ہوتا ہے جب میں انگلی کی مدد سے اسے پکڑتی ہوں تو یہ مجھے اسکیل کا بتاتا ہے۔ اس موقع پر سوہا نے اپنی ایک دھن بھی سنائی۔