کراچی سہراب گوٹھ کے علاقے میں 8 سالہ اسرار کے جاں بحق اور 20 سالہ عباس کو زخمی کرنے والے ڈاکووں کے خلاف مقدمہ درج کرلیا گیا۔
تفصیلات کے مطابق سہراب گوٹھ تھانے میں مقتول 8 سالہ اسرار کے والد قاسم خان کی مدعیت میں مقدمہ درج کرلیا گیا جس میں قتل، اقدام قتل کی دفعات ایف آئی آر میں شامل کی گئی ہے۔
مدعی قاسم خان کے مطابق میں جونیجو کالونی میں ہوٹل چلاتا ہوں رات کو میرا بیٹا 8 سالہ اسرار اور بھائی عباس گلی میں ہوٹل کے باہر بیٹھے ہوئے تھے اچانک ایک موٹر سائیکل 125 پر 2 اشخاص آئے اور آپس میں جھگڑا کرنے لگے۔
والد قاسم نے بتایا کہ جھگڑا کرنے والے نصراللہ عرف روغ لیوانے میں جانتا تھا نصر اللہ نے اپنے پاس موجود 2 پستول نکالے تو اس کے ساتھی نے ایک پستول چھین لیا نصر اللہ نے اپنے پستول سے اس پر اندھا دھند فائرنگ شروع کردی۔
مدعی نے کہا کہ پستول سے نکلنے والی گولی میرے بیٹے کے سر پر اور ایک گولی بھائی کی پیٹھ پر لگی بھائی اور بیٹا دونوں زخمی ہوکر زمین پر گر گئے نصر اللہ فائرنگ کرتا ہوا اپنی موٹر سائیکل چھوڑ کر پیدل ندی کی جانب بھاگ گیا میرا دعویٰ ہے کہ نصر اللہ اور اس کے نامعلوم ساتھی نے میرے بیٹے کو فائرنگ کرکے جاں بحق اور بھائی کو زخمی کیا۔
